
Нийслэлийн шуурхай зөвлөгөөний мэдээллээр нийслэлийн замын ажил нийт 64 байршлын 74.87 км-ээс 75 хувьтай явж, засвар арчлалтын ажил 90 хувьд хүрчээ. Өдөрт дунджаар 591 мянган тээврийн хэрэгсэл хөдөлгөөнд оролцож, дундаж хурд 14.4 км/цаг байгаа нь түгжрэл, халтиргаа давхардсан үед ослын эрсдэлийг нэмэгдүүлдэг.

Цас орсон үед хотын 48 байгууллагын 1,400 орчим ажилтан, 180 машин техник ажиллаж, нэг өглөө л гэхэд 299.7 тонн давс, 53 тонн бодис цацсан байна. Эрсдэлтэй 400 гаруй байршлыг урьдчилан тогтоож, давс, бодисын нөөцийн сав байршуулжээ.

Иргэдэд зориулсан зөвлөгөө: явган зорчигчид зөвхөн гарцаар зам гарах, жолооч нар хурдаа тохируулж, хоорондын зайгаа барих, аж ахуйн нэгжүүд өөрийн орчны 50 метр хүртэлх талбайн цасыг тухай бүр цэвэрлэх. “Хотын дарга сонсож байна” 150150 тусгай дугаарт гомдол, хүсэлтээ өгөх боломжтой бөгөөд ирсэн хүсэлтийн 92.3 хувийг шийдвэрлэсэн гэж нийслэл мэдээллээ.
Эх сурвалж: МҮОНРТ