Засгийн газраас Боловсролын зээлийн сан байгуулж, сургалтын төлбөрийн зориулалттай Оюутны хөгжлийн зээлийг олгох шийдвэрийг гаргасан. “Сургалтын төлбөрийн зориулалттай оюутны хөгжлийн зээлийн үйлчилгээг Боловсролын зээлийн сан хариуцан зохион байгуулах бөгөөд зээлийг арилжааны банкууд олгоно.
Ингэхдээ Оюутны хөгжлийн зээлийг аль болох хурдан шийдвэрлэхээр ажиллаж байна” хэмээн Боловсролын зээлийн сангийн ахлах мэргэжилтэн С.Дэлгэрмаа хэллээ. “Одоогийн байдлаар зээлийг олгох гурвалсан гэрээг боловсруулах шатандаа явж байна. Банк, Сургалтын төрийн сан, Оюутан гэсэн гурвалсан гэрээ нь хөгжлийн зээл хөтөлбөрийн цөм юм. Арилжааны банкууд зээл хүсэгч оюутанд тавигдах шаардлагыг боловсруулна” гэлээ.
Оюутнууд материалаа бүрдүүлээд өөрийн сургуулийн сургалтын албанд хураалгах аж. Тухайн их, дээд сургууль, коллежоос тогтоосон сургалтын төлбөрийн хэмжээгээр оюутны хөгжлийн зээлийг олгоно. Оюутнууд суралцах хугацаандаа улирал бүр оюутны хөгжлийн зээлийг авах боломжтой. Судалгаагаар 70 гаруй мянган оюутан зээл авах боломжтой гэж үзжээ.
Х.ТЭМҮҮЖИННАМСРАЙ