Гудамж төслийн дэд төслийн хүрээнд Нийслэлийн Засаг даргын захирамжийн дагуу УИД-ээс Цирк хүртэлх гудамжийг амралтын өдрөөр автомашингүй гудамж болгохоор шийдвэрлэжээ. Энэхүү шийдвэр нь хотыг хөгжүүлэх 2020 он хүртэлх ерөнхий төлөвлөгөөний “Хотын төв” төслийн нэг хэсэг юм.
Мөн энэ хүрээнд Чингэлтэй, Сүхбаатар дүүргийн 15 байршилд 14.318 ам.метр талбайг шинэчлэн тохижуулж автомашингүй гудамж болгохоор тендер зарлан төсөл хэрэгжүүлж, газрын дуудлага худалдаа зарлах замаар ажил хэрэг болгох гэнэ.
УИД-ээс Цирк хүртэлх гудамжийг автомашингүй болгохын зэрэгцээ олон нийтийн амралт чөлөөт цагт зориулсан газар доорх байгууламжийг бий болгохоор төлөвлөжээ. Энэхүү ажил 2 жилийн хугацаанд хэрэгжиж дуусвал гудамжны 2 талын замын хөдөлгөөнийг амралтын өдрүүдэд бүрэн хаахаар тогтсон байна. Газар доогуурх байгууламж нь автомашингүй байх бөгөөд 9940 ам.метр талбайтай байх ажээ.
Х. АЯЛГУУ
