Энэ оны нэгдүгээр сард “Монгол тулгатны 100 эрхэм” нэвтрүүлгийг зарим дугаарын хар материалууд олон нийтийн сүлжээгээр цацагдсан. Тодруулбал МАХН-ын дарга Н.Энхбаярын тус нэвтрүүлэгт оролцох үеийн хасагдсан хар дүрс нь алдагдаж, цахим ертөнцөд шуугиан дэгдээсэн билээ. Энэ үеэр "Hero Entertainment" студийн захирал, найруулагч Б.Баатар бичлэгүүдийг маш том бүлэглэл хулгайлсан талаар мэдээлэл хийж, хэргийг шалгуулахаар цагдаад хандсан болохоо мэдэгдэж байсан. Тэгвэл өнөөдөр “Монгол тулгатны 100 эрхэм” хөтлөгч П.Анужин сэтгүүлчдэд хандан мэдээлэл хийлээ. Тэрбээр “Цагдаагийн байгууллагын мэдэгдэлд "Монгол тулгатны 100 эрхэм" нэвтрүүлгийн бичлэг алдагдахад гадны том бүлэглэл ороогүй гэдэг нь тодорхой болсон. Тийм учраас энэ нэвтрүүлгийг санаачлагчийн хувьд энэ асуудал эцэслэн шийдэгдтэл “Монгол тулгатны 100 эрхэм” нэвтрүүлгийг гаргахгүй байх хүсэлтийг “Херо энтертайнмэнт” студид тавьж байна” гэв.
Тус нэвтрүүлгийн оюуны өмчийн гэрчилгээ нь П.Анужин байдаг болохыг хэвлэлийн бага хурлын үеэр сэтгүүлчдэд үзүүллээ.
А.САЯН