Өнөөдөр ЭМЯ-ны ээлжит хэвлэлийн хурлын үеэр манай улсад коронавирусийн халдварын тохиолдол нэмэгдсэн эсэх талаар шинжилгээний хариуг мэдээллээ.
ХӨСҮТ-ийн захирал Д.Нямхүү "Зургадугаар сарын 11-нд гурван лабораторид нийт 241 хүнд шинжилгээ хийхэд 238 тохиолдлоос халдвар илрээгүй. Нурсултан-Улаанбаатарын онгоцоор ирсэн 184 хүнээс гурвыг нь ХӨСҮТ-д тусгаарлан шинжлээд хариуг нь өчигдөр мэдээлсэн байсан. Үлдсэн 181 иргэний сорьцыг цуглуулж, шинжлэхэд гурван хүнд коронавирус илэрлээ.
Өнөөдөр зургаан хүн эдгэрч ХӨСҮТ-өөс гарч, дараагийн ажиглалт уруу шилжлээ. Эдгэрсэн хүмүүс бүгд оюутан байсан бөгөөд дөрөв нь батлан хамгаалахын сургуулийнх, хоёр нь эмэгтэй, дөрөв нь эрэгтэй. Тавдугаар сарын 13, 14-нд ирсэн эдгээр оюутнуудын эмчилгээ 27-29 хоног үргэлжиллээ.
Нийт батлагдсан тохиолдол 197 болж 95 нь эдгэрсэн. Үлдсэн 102 иргэний биеийн байдлыг авч үзвэл гурван жирэмсэн эмэгтэй, нэг хорт хавдартай иргэн, чихрийн шижинтэй нэг хүн ХӨСҮТ-д эмчлэгдэж байна" гэв. Мөн 91 иргэн хэвийн ,арван нэгэн хүний биеийн байдал хүнд байна.
