(1).jpg)
ХӨСҮТ, Дархан-Уул аймгийн вирус судлалын лабораторид өчигдөр нийт 350 хүний сорьцод шинжилгээ хийхэд коронавирусийн халдвар илрээгүй хэмээн ХӨСҮТ-ийн ерөнхий захирал Д.Нямхүү мэдээллээ.
Тус шинжилгээнд 8 дугаар сарын 20-нд Хонконг-Улаанбаатар чиглэлийн тусгай онгоцоор ирсэн 113 хүн, 8 дугаар сарын 27, 28-нд Замын-Үүд боомтоор орж ирсэн 95 хүн, 8 дугаар сарын 20-нд Алтанбулаг боомтоор орж ирсэн 45 иргэн болон ачаа тээврийн 45 жолоочийн шинжилгээ багтжээ. Мөн тусгаарлах байранд тусгаарлагдсан 20, сувилалд тусгаарлагдсан 10, ХӨСҮТ-д тусгаарлагдсан 11, тандалтын зорилгоор цуглуулсан 11 хүний давтан шинжилгээнд коронавирус илрээгүй байна.
Өнөөдрийн байдлаар, манай улсад коронавирусийн батлагдсан 310 тохиолдол бүртгэгдсэнээс 296 нь эдгэрчээ. Сувилалд 9 хүн, гэрийн ажиглалтад 29 хүн байгаа бол 258 хүний ажиглалт тандалтын хугацаа дуусжээ. ХӨСҮТ-д одоогоор коронавирусийн халдвартай 14 хүн эмчлүүлж байгаагаас 8 хүний биеийн байдал хөнгөн, 6 нь хүндэвтэр байна.
Хонконг-Улаанбаатар чиглэлийн тусгай нислэгээр өчигдөр ирсэн 261 хүний шинжилгээний хариуг маргааш танилцуулах аж.
Эх сурвалж: МОНЦАМЭ
