Монгол Улсын Засгийн газар, Хүнс хөдөө аж ахуй хөнгөн үйлдвэрийн яам малын чанар удам угсааг сайжруулах, эрүүл мэндийг хамгаалах эрх зүйн орчинг боловсронгуй болгох зорилгоор “Мал амьтны эрүүл мэндийн тухай”, “Малын генетик нөөцийн тухай” хуулийн төслүүдийг Улсын их хурал, холбогдох байнгын хороогоор хэлэлцүүлж байгаа. Мал аж ахуйн салбарын чухал эдгээр хуулийн төслийг хэлэлцэх энэ үед “Малчдын улсын зөвлөгөөн”-ийг Улаанбаатар хотод зохион байгуулж, малчдын саналыг Мал амьтны эрүүл мэндийн тухай”, “Малын генетик нөөцийн тухай”хуулийн төсөлд тусгах санал солилцлоо. Зөвлөгөөний үер Төрөөс малчдын талаар баримтлах бодлого, Монгол мал үндэсний хөтөлбөр, Малын эрүүл мэнд үндэсний хөтөлбөр, Эрчимжсэн мал аж ахуйн хөгжлийг дэмжих үндэсний хөтөлбөр, Монгол малчин үндэсний хөтөлбөрийг талаар болон 2017 онд малын удам угшлыг сайжруулах жил болгон зарласан тухай малчдад цогц мэдээллийг хүргэсэн юм.
Зөвлөгөөний үеэр малчдаас мал сүргийг эрүүлжүүлэх, вакцинжуулах, мал эмнэлгийг төрийн мэдэлд авах, малын түүхий эдийн үнэ, түүхий эд бэлтгэлийн тогтолцоог сэргээх, малын удам угсааг сайжруулах, малын тооноос чанарт шилжих, бэлчээр ашиглалт хамгаалалт, малчдын залгамж халаа, малын хулгайтай тэмцэх, малчны лавлах ажиллуулах гэсэн олон чухал асуудлыг хөндөж байв.
Малчдаас гаргасан дээрх саналыг үндэслэн Хүнс хөдөө аж ахуй хөнгөн үйлдвэрийн яамнаас төлөвлөгөө гаргаж ажиллаж эхэлсэн байна. Мөн малчдын санал, гомдлыг тогтмол сонсож, хэрэгжүүлж буй ажилдаа тусгах зорилгоор “Малчдаа сонсъё” 109 утсыг ажиллуулахаар боллоо.
Эх сурвалж : ХХААХҮЯ
