Гишүүд нь даргаа эсэргүүцэж байна. "Сонгуулийн хуульд заасанчлан 4-р сарын 29-нөөс өмнө сонгуульд оролцох эсэхээ СЕХ-нд мэдэгдэх ёстой. Тухайн хугацаанаас өмнө намын бүх шатанд энэ асуудлыг шийдэж амжихгүй. Нэгдэх асуудал цаг хугацааны хувьд боломжгүй болсон" гэдэг үндэслэлээр ИЗНН-ын нийслэлийн намын хорооны дэд дарга С.Мөнхнасан ИЗНН нь АН-тай нэгдэхгүй гэж байр сууриа хэвлэлээр илэрхийлээд удаагүй байна. Мөн нийслэл, дүүрэг, аймгийн хороодын гишүүдийн 90 хувь нь нэгдэхгүй гэсэн судалгаа гарсан. Гишүүд нь ҮГҮЙ гэж хэлж байхад НАМ нэгдэх, нийлэх асуудал огт яригдахгүй хэмээн тэр нэмж хэллээ. Энэ бол АН-ын удирдлагад бус намынхаа дарга С.Оюунд хандаж хэлсэн үг гэж ойлгогдохоор байна. Харин Оюун "Эцсийн шийдвэрийг намын их хурал гаргана" гэдэг хариуг одоохондоо өгөөд байна. Тэр Их хурлынхаа төлөөлөгчдөд найдаж байна. Түүний хариу бол АН-д даган орох. Харин ямар шийд гаргахыг удахгүй болох ИЗНН-ын их хурал шийдэх нь. Энэ хурал Оюуны хувьд сүүлчийн хурал болох нь тодорхой боллоо. Хэрвээ нам нь нэгдэхгүй шийдвэр гаргавал, тэр дангаараа АН-д элсэнэ гэсэн таамаглалыг судлаачид дэвшүүлж эхэллээ.
Тоймч Ц. БАТ- ЭНХ
