Н.Энхбаяр гэдэг хүний хаялага буянаар Тэрбишдагва, Улаан, Баянсэлэнгэ, Цолмон, Оюунбаатар, Сономпил, Уянга, Баасанхүү, Батцэрэг нарын 13 хүн УИХ-ын гишүүн болж Удвал, Шаравдорж, Энхсайхан, Тулга нарын тойрон хүрээлэгчид төр засгийн байгууллагад сайд, дэд сайд, дарга хийж байна. Түүний буянаар Ц.Элбэгдорж ч ерөнхийлөгчөөр дахин сонгогдсон гэдэг. "Өөх өгсөн хүнтэй өглөө босоод заргалдана"' гэгчээр өндөр албан тушаалд тухалсан тэдний олонхи нь "Би" өвчнөөр өвчилж, Н.Энхбаярыгаа нэг нүдээр ч харахаа больсон цаг, саяхан. Тэгвэл, Энхбаярт дахин эрүү үүсгэж, сонгуульд МАХН-ын оролцох эрхийг хаахыг оролдох тусам, түүний үнэ цэн улам бүр дээшилж байна гэж шинжээчид дүгнэж байна. Түүнийг орхиход бэлэн, огт хамааралгүй гэж хэлж байсан улс төрчид эргээд л ЭНХБАЯРЫГАА тойрч , тойглож эхэлжээ. Түүний рэйтинг өндөр, намынх нь рэйтинг тогтвортой өсөж байгаа нь улс төрд эрх мэдлээ хадгалах хүсэлтэй хүмүүсийн санаа бодолд нөлөөлж эхэллээ гэж хөндлөнгийн шинжээчид дүгнэж байна. МАХН, МАН хамтарч ойгоо тэмдэглэлээ. Нуруугаараа ч нийлэлгүй удсан МАХН-МАН-ын удирдлагууд нүүр хагарах биш, бүр хамтарсан нь улс төрийн намуудад томоохон сануулга өглөө. Ирэх 4 жилд хэн засгийн эрхийг гартаа атгах вэ? Гэдэг асуултыг асуухдаа Н.Энхбаяр гэдэг хүнийг тойрохгүй боллоо гэж үзэх нь ихэсчээ.
Ц.ЭНХБАТ