Даргыгаа авилга авсан гэдгийг Энхбаярын шадар түшмэдүүд толгой дараалан мэдэгдэж эхэллээ. Эхлээд Шийлэгдамба. Их л зориг гаргасан гэж нийгэм хүлээн авсан. Мэдээж шахалтанд орсон ч гэж дүгнэх хэсэг байсныг үгүйсгэхгүй. Н.Энхбаяр " Шийлэгдамба их айсан , сандарсан байсан. Тэр бол бидний таних Шийлэгдамба биш байсан. Би түүнээс мөнгө аваагүй " гэж хэлсэн нь Шийлэгдамбыг хэргээ өөрөө үүрээрэй гэж хэлэхтэй адил сонсогдсон гэж ажиглагчид хэлдэг. Түүний дараа намынх нь аж ахуй хариуцсан дарга Цогтбаатар мөн л дуудагдаж, Шийлэгдамбын хэлснийг баталсан гэж байгаа. Төдөлгүй бас нэг намынх нь зүтгэлтэн 500 сая төгрөгийн асуудлыг дарга Н.Энхбаяртайгаа холбож хэвлэлээр цацсан. Дээрхи хүмүүсийг дарамтан дор хэлсэн гэж саная гэж бодоход, УИХ-ын гишүүн Цог бол яавч дарамтад орохгүй хүн. Тэр бол хуульч. Хоёр ч удаа төр барьж байгаа түшээ. Хаана, хэзээ, юу гэж хэлэхээ хэнээр ч заалгахгүй сайн мэднэ. Түүний Н.Энхбаяр дарга надаас нэг сая доллар нэхсэн гэдэг бол өнгөрсөн долоо хоногийн хамгийн шуугиан тарьсан мэдэгдэл боллоо. Яагаад ингэж хэлэв ? гэдгийг тайлах гэж оролдох ч хэрэг алга. Ямар ч гэсэн нэр дэвшигчдээсээ, дээр нь албан тушаалд томилогдсон хүмүүсээсээ мөнгө нэхдэг, татдаг гэдгийг нь зоригтой илчиллээ. МАХН-аас дахиж нэр дэвшихгүй гэдгээ ч давхар нотоллоо. Намын даргаасаа огт хамааралгүй гэдгээ ч чанга дуугаар хэллээ гэж ажиглагчид дүгнэж байна. Шударга ёс, шударга ёс гэчихээд, өөрсдөө шударга байцгаая л гэж Цог дуугарлаа. Намынхаа даргын тухай ингэж хэлэх хүмүүс Цогоор дуусах болов уу , үгүй болов уу? гэдэг асуудал олны дунд асуулт хэвээр үлдлээ.
Д. ЦОГТ-ОЧИР
