Эрдэнэжамъян МАХН болон Н.Энхбаярын итгэлтэй хүний нэгэнд тооцогддог. Албан тушаалын хуваарилалтаар Хууль Зүйн дэд сайдаар томилогдож байсан. Албан үүргээ хэтрүүлэн ашигласан гэсэн зүйл заалтаар Тэмүүжин сайд түүнийг үүрэгт ажлаас нь чөлөөлж байсан түүхтэй. Интерполд захидал бичсэний төлөө түүнийг чөлөөлснийг санах нэг уншигчид байгаа байх аа. Харин тэр өнөөдөр МАХН-ынхаа даргын гол өмгөөлөгч болж байх шиг байна. Сануулахад, УИХ-д жагсаалтаар орсон Баасанхүү 2012 оны сонгуулийн өмнө намынхаа даргыг өмгөөлөх, олон нийт, хэвлэлд хандах ажлыг хариуцдаг байсан. Тэгж байхдаа, тойрогт нэр дэвших байснаа өөрчлүүлж, жагсаалтын эхний арав дотор бичүүлж амжсан. Тэгээд юу болсныг бид бүгд мэднэ. Түүнтэй ижил нөхцөл өнөөдөр бүрдлээ. Өршөөлийн хуульд хамрагдсан МАХН-ын дарга Н.Энхбаярт АТГ-аас шинээр эрүү үүсгэж эхэлсэн. Журмын нөхдүүд нь голдуу даргынхаа эсрэг мэдүүлэг өгөөд байгаа. Энэ дөнгөнөөс даргыгаа мулталж чадах уу гээд олон асуудал түүнд байна. Тиймээс Эрдэнэжамьян АТГ-тай тулж ажиллахаар шийдсэн нь анзаарагдана. Эрдэнэжамъяны хувьд улс төрд хөл тавихаар нэг мөр шийдсэн нь илэрхий. Ажиглагчдын хэлж буйгаар, Эрдэнэжамьян намынхаа жагсаалтад дээгүүр бичигдэх магадлалтай хүмүүсийн эгнээнд хэдийнээ багтсан байна. Нам амжилттай оролцвол, асуудлыг хэрхэн шийдсэнээс үл хамааран Эрдэнэжамъян өөрийн хүсэн мөрөөдсөн УИХ-ын гишүүний суудалд заларна. Үүнийг хөдөлмөр зүтгэл гэнэ үү, шагнал гэнэ үү, юу гэж нэрлэх ойлгох нь бусдын асуудал.
Ц.ОТГОНБАЯР
