Наурыз баяр 3 дугаар сарын 22-нд болдог бөгөөд энэ өдөр, өдөр шөнө тэнцдэг гэж үздэг. Ислам шашинт орнуудын цаг тооллоор шинэ он гарч, хаврын улирал эхэлсэн өдөр гэж үздэг. “Наурыз” перс гаралтай үг бөгөөд монголчилбол “нау-шинэ”, “рыз-өдөр” буюу “шинэ өдөр” гэсэн утгатай үг юм. Казах түмэн эртнээс өвлийн хахир хатуу цагийг өнтэй давж, урин хавартай учирч золгосны баяраа энэ өдөр тэмдэглэж ирсэн уламжлалтай. Наурызын баярыг хаврын баяр мөн нарны баяр ч гэж нэрлэх нь бий. Казахууд нарыг шүтэх бөгөөд 3-р сарын 22-ний өглөө эртлэн босч нараа шинжиж тухайн жилийнхээ өнгө төрхийг хэлэлцдэг. Наурызаар мандаж буй өглөөний наранд ёсолж, залбирал үйлдсэний дараа хоорондоо золгож мэндэлснээр эхэлдэг уламжлалтай.
Х. АЯЛГУУ
