Сонгууль ойртох тусам улс төрийн тогоо улам халуунаар буцалж улс төрчид нам, эвсэл, бүлэг фракцаа солих болон гарах нь ихсээд байна. Үүний нэгэн жишээ нь УИХ-ын гишүүн Л.Цог, Г.Уянга нар өчигдөр сэтгүүлчдэд мэдээлэл хийж, “Шударга ёс” эвслийн бүлгээс гарна гэдгээ албан ёсоор мэдэгдсэн юм. Өмнө нь тэдэнтэй УИХ-ын гишүүн О.Баасанхүү нэгдэж байсан бөгөөд энэ удаад нэр бүхий хоёр гишүүн эвслийн бүлгээ орхихоор болсноо хэвлэлээр дамжуулан олон нийтэд ийнхүү дуулгасан юм. Тэд “Шударга ёс” эвслээс гарснаар уг бүлэг 8 гишүүнтэй болж байгаа юм. УИХ-ын гишүүн Л.Цогын “Шударга ёс” эвслийн бүлгийг төлөөлөн УИХ-ын дэд даргаар ажилладаг. Түүнийг ийнхүү бүлгээсээ гарахтай зэрэгцэн дараагийн УИХ-ын дэд даргын суудалд горилогчдын нэрс тодорчээ. Өөрөөр хэлбэл Л.Цогийн оронд УИХ-ын дэд даргад О.Баасанхүү яригдаж эхэлсэн байна.
Х. АЯЛГУУ
