Сүүлийн жилүүдэд Монгол Улсын хэмжээнд халдварт өвчний гаралт болон халдвар авагсад нэмэгдэж байгаа мэдээлэл байн байн явах боллоо. Тухайлбал өнгөрсөн онд улсын хэмжээнд сүрьеэгийн 4720 шинэ тохиолдол бүртгэгдсэн байна. Үүнээс 9 хувийг хүүхдийн сүрьеэгийн өвчлөл эзэлж байгаа нь санаа зовоох асуудал яах аргагүй мөн. Ялангуяа хүүхдүүд эмэнд тэсвэртэй сүрьеэ буюу хүнд хэлбэрээр өвчилж байгаа нь анхаарал татаж байна. Сүрьеэтэй хүн эмээ тогтмол, зааврын дагуу уугаагүйгээс эмэнд дасалтай сүрьеэ болдог. Харин эмэнд дасалтай сүрьеэг эмчлэх эмийн зардал өндөр, эмчилгээний хугацаа урт буюу 18-24 сар байдаг. Өөрөөр хэлбэл хүнд хэлбэрийн сүрьеэг эмчлэхийн тулд 9-20 сая төгрөгийн зардал гардаг.
Уг нь Монгол Улс 2030 он гэхэд сүрьеэгүй болох зорилт тавьсан. Гэвч одоогоор сайдгүй байгаа салбар нэмэгдсээр байгаа нийгмийн халдварт өвчнүүдэдээ ямар арга хэмжээ авах гэж байгаа нь бүрхэг хэвээр байна.
Сүрьеэ өвчний нэг шалтгаан болсон ядуурлыг бууруулахгүйгээр энэ өвчнөөс бүр мөсөн салах аргагүй ч сэргийлж болох олон аргууд байдаг. Улаанбаатар хотын утаа тоосжилт, гэр хорооллын хог хаягдал, угаадсыг багасгах тал дээр арга хэмжээ авч үйл ажиллагаа явуулж буй газрууд харагдахгүй байна.
Х. АЯЛГУУ