Улс төр бол тэр чигтээ тохироо. Эрх мэдэлтэй хүмүүс хоорондоо тохиролцоод асуудлыг шийддэг практик монголын улс төрд үргэлжилсээр. Эрх мэдэлтэй хүмүүс ганцхан зүйлээс айдаг. Тэр нь эрх мэдлээ алдах айдас юм. Одоогийн эрх баригчид ч бас болгоомжилж байгаа. Тэдэнд эрх мэдлээ хадгалах найдлага тун бага болсон. Бүх судалгаа, тандалт ийм л дүгнэлт хийхэд хүргэж байгаа. Тиймээс янз бүрийн хувилбар хайж эхэлсэн. Нэгдэх, эвсэх гээд. Хуулиа өөрсдийнхөөрөө өөрчилж чадсан. Одоо өрсөлдөгчгүй болох арга зам эрэлхийлж байгаа. Энэ тооцоонд сонгуульд оролцох улс төрийн шинэ нам багтах нь зүйн хэрэг.
ХҮН, МАХН гэсэн хоёр нам яршиг удах магадлалтай. ХҮН нам дотроо хагарсан, маргаантай тул Дээд Шүүхээс дахин бүртгэхийг нь хойшлуулсаар байгаа. МАХН-ын санхүүг нь лацдаж, даргыг нь мөрдөн байцаалтад дуудсан үйл явц өрнөсөн. Дээрх үйлдлүүд нь тухайн хоёр намын үйл ажиллагааг хангалттай сааруулсан гэх үндэслэлтэй. Тоглолт дуусаагүй. Гэхдээ Н.Энхбаяртай эхний тохироо хийсэн байх магадлал бий гэж ажиглагчид үзэж байна. Ямар тохироо хийсэн нь одоохондоо нууц.
Ямар ч гэсэн Энхбаяр шадар сайд болохгүй, сонгуульд нэр дэвшихгүй, намынхаа үйл ажиллагааг гардан удирдахгүй гэж тохирсон байх магадлалтай. Аль намтай эвсэхээ ч урьдчилан тохирсон байж байж болох. Түүнийг өнгөрөгч амралтын өдрүүдэд биеэ эмчлүүлэх шаардлагатай гэсэн үндэслэлээр Солонгос орныг зорьсон гэх мэдээлэл байна. Гадагшаа хил давахыг хориглосон гэж байсан нь саад болсонгүй. Тэгэхээр тохиролцоонд хүрсэн нь үнэн болох нь. Тиймээс 2016 оны УИХ-ын сонгууль Энхбаяргүй болох нь тодорхой болжээ. Гэхдээ нам нь аль намтай эвсэж сонгуульд орохыг Энхбаяр л шийднэ. Тэгэхлээр Энхбаярын шууд оролцоогүй ч, алсын удирдлагатай сонгууль болох нь ээ.
Ц.ОТГОНБАЯР