УИХ-ын гишүүн О.Баасанхүү УИХ-ын ээлжит бус чуулганыг зарласаныг эсэргүүцэж МАХН-ын гишүүдээ тус хуралд оролцохгүй байхыг уриаллаа. Тус хуралдаанаар Ашигласан түлшний болон цацраг идэвхт хаягдлын менежментийн аюулгүй ажиллагааны тухай 1997 оны конвенцид нэгдэн орох тухай хуулийн төсөл, Бага хэмжээний цөмийн материалын шинэчилсэн протоколыг соёрхон батлах тухай хуулийн төсөл, Цөмийн аюулгүй ажиллагааны тухай 1994 оны конвенцэд нэгдэн орох тухай хуулийн төсөл, Цөмийн материалыг биечлэн хамгаалах тухай 1980 оны конвенцийн 2005 оны нэмэлт, өөрчлөлтийн тухай протоколыг соёрхон батлах тухай хуулийн төслийг хэлэлцэхээр болсонд О.Баасанхүү гишүүн эсэргүүцэж буйгаа мэдэгдэв.
Тэрээр УИХ дахь МАХН-МҮАН-ын Шударга ёс бүлгийн гишүүдийг тус ээлжит бус чуулганд оролцохгүй байхыг уриалав. Хэрэв дээрх ээлжит бус чуулганы хуралдаанд Шударга ёс эвслийг бүрдүүлэгч МАХН-ын гишүүд оролцох юм бол МАХН-ын Монголын Ногоон намтай 2016 оны УИХ-ын сонгуульд эвсэж орох асуудал цуцлагдана гэнэ. Тус намын зүгээс МАХН-д хандан дээрх нэр бүхий хуулийн төслүүдийг хэлэлцэхэд оролцохгүй байхыг уриаллаа.
О.Баасанхүү ийнхүү тамга хөзөр атгасан хүний дүртэй аяглав. Тэр үнэндээ “бодож байна” гэх нэрээр атгасан хөзрөө хэнд, хэрхэн үнэд оруулах вэ гэдгээ бодон суугаа. Гэхдээ гэнэт цадах гэдсэнд халтай гэдэгсэн. Гэнэт ингэж тодорч том том дуугарах нь сайны ёр мөн үү?
Цөмийн хог хаягдлыг Монголд Улсад булшлах тухай асуудал ид яригдаж байгаа энэ үед О.Баасанхүү ийнхүү барьцаалснаар нэг тийш шийдэгдэхгүй нь мэдээж. Харин ч эсрэгээрээ байдал тодорхой бус байгаа нь хуулийн гадуур хор найруулах бололцоог олгоно. Үүнийг мэдсээр байж ийнхүү хуралд суухгүй байхыг уриалах нь өөрийн амин хувийг бодсон арчаагүй үйлдэл гэлтэй. Монголчуудад цөмийн материалыг хууль дүрмийнхээ хүрээнд хэрхэх нь чухал болохоос биш Баасанхүүгийн сандал суудлаа хэнд үнэд хүргэх нь огтхон ч сонин биш.
Өндрөөс унахад өвддөг гэдгийг өнөө хүртэл мэдээгүй яваа цээж өвчтэй нялх улс төрчид энэ үгийг даймаар.
Х. АЯЛГУУ
