25 жил Монгол улсыг удирдсан хүмүүс улс орныг "ХӨГЖИЛ " рүү биш "АНГАЛ" руу хөтөлжээ. Энэ хүмүүсийн нэрийг дурдахаас залхаж байна. 2 жилийн өмнө Монгол улсын ерөнхий сайдаар томилогдохдоо "Нэгдүгээрт эдийн засаг, хоёрдугаарт эдийн засаг, гуравдугаарт эдийн засаг" гэж хэлж байсныг Монголын ард иргэд мартаагүй.
Үнэхээр ард иргэдийнхээ ахуй амьдралыг өөд нь татах бодолтой хүн гарч ирлээ л гэж харсан, итгэсэн, хүлээсэн. Өнөөдөр энэ итгэл найдвар талаар болж байгааг нүдээрээ харж, биеэрээ мэдэрч байна, Монголчууд. МАН-ынхан адилхан өр тавьсан, тэд юу ч хийгээгүй. Бид өр тавьсан ч, зам тавьсан гэх юм яриад сууж байна, Эдийн засгийн Форум дээр. Эдийн засгийн хөгжлийн гарц юу байгааг хэлж заахгүй, алдсан боломжийн тухай баахан гомдоллоо. "Эдийн засаг, эдийн засаг, эдийн засаг" гэж гарч ирсэн түүний Эдийн засгийн Форум дээр тавьсан илтгэлийг "Улс төрийн сурталчилгаа" хийлээ гэж хөндлөнгийн ажиглагчид дүгнэлээ.
Түүний "Нэгдүгээрт эдийн засаг, хоёрдугаарт эдийн засаг, гуравдугаарт эдийн засаг" гэж хэлсэн үг "Нэгдүгээрт зээл, хоёрдугаарт зээл, гуравдугаарт зээл" гэж орчуулагдах байсныг хоёр жилийн өмнө хэн ч таасангүй. Тэр өрийн тухай ярихыг бүр ч хүсэхгүй байна. Өр ярихдаа тулбал, чи ч бас тавьсан гэж улайрч эхэллээ. Хоёр хар хэрээ бие биенийхээ харыг гайхна гэдэг энэ буюу.
Нийтлэлч Ц.ЭНХБАТ