Нийслэлийн төв цэвэрлэх байгууламж буюу хүмүүсийн ногоон нуур хэмээн сэжиглэн цээрлэдэг газарт 200 гаруй хүн ажилладаг. Гэвч тэдгээр хүмүүс өдийг хүртэл хүнд хортой нөхцөлд ажилладаг ч энэ зэрэглэлд ороогүй ямар ч нэмэгдэл авдаггүй нь саяхан анхаарал татаж хэвлэлээр шуугисан. Харин 14 хоногийн өмнө Хөдөлмөрийн сайд газар дээр нь очиж танилцан тэдгээр хүмүүсийг хүнд хортой нөхцөлд тогтоох тухай зохих хүмүүст үүрэг болгосон. Тэгвэл энэ шийдвэрийн дагуу судалгааг хийж байгаа бөгөөд ажиллагсдын 90 хувь нь чих хамар хоолойн өвчтэй, сүүлийн 3 жилийн дотор тэдний мэдрэл, дотрын өвчлөл мэдэгдэхүйц нэмэгдсэн нь эхний байдлаар тогтоогдсон байна. Мөн судалгааг хийж эхлэхээс өмнөхөн тэтгэвэртээ гарсан нэгэн ахмад архаг сүрьеэгээр өвдөн нас баржээ. Хөдөлмөрийн нөхцөл тогтоох судалгааг 4 дүгээр сарын 15-наас өмнө дуусгахаар шинжээчид ажиллаж байна.
