Улаанбурхан өвчний дэгдэлтийг буулгуулахаар Засгийн газар, ЭМСЯ болон ХӨСҮТ шуурхай арга хэмжээ аван ажиллаж байна. Он гарсаар 4 дүгээр сарын 11-ний өдрийн байдлаар улсын хэмжээнд нийт 14668 Улаанбурхан өвчний сэжигтэй тохиолдлоос 3158 (21.5%) нь лабораторийн шинжилгээгээр батлагдсан байна. Өвчлөлийн насны хувьд 33%-ийг 15-29 насныхан, 15%-ийг 0-8 сартай буюу вакцин тариулах нас болоогүй хүүхдийн өвчлөл эзэлж байгаа юм.
Зураг 1. Улаанбурхан өвчний өнөөгийн байдал, 7 хоногоор, 2015 оны 3 сараас 2016 оны 4 сарын 2 хүртэл
Үүнтэй холбоотойгоор Засгийн газраас тогтоол гарган өвчлөл өндөр бүртгэгдэж байгаа 18-30 насныхныг нэмэлт дархлаажуулалтад шаардагдах зардал болох 948 300 000 төгрөгийг Засгийн газрын нөөц хөрөнгөнөөс шийдвэрлэсэн. Халдварт өвчин судлалын үндэсний төвд нэн шаардлагатай 350 сая төгрөгийн тоног төхөөрөмжийг шууд худалдан авах гэрээгээр авахаар шийдвэрлэж, зарим яаралтай тусламжийн тоног төхөөрөмжөөр хангаад байна.
ХӨСҮТ-ийн эрчимт эмчилгээний тасагт нярайн болон мэдрэлийн зөвлөх эмч, 16 сувилагчийг нэмэлтээр ажиллуулж байна. Эдгээр эмч, сувилагч нарын илүү цагийн зардал 114 сая төгрөгийг Засгийн газраас олгохоор шийдвэрлэжээ. Өнөөдрийн байдлаар Улаанбурхан өвчний голомтын хүрээний 60 000 гаруй хүнийг улаанбурхан, улаануудын эсрэг вакцинаар дархлаажуулаад байна.
Л. ГАНТУЯА
