Хүн бүр л толинд харах дуртай. Гоо үзэмжээ тольдохоос гадна бие эрхтнээ бас ажиглаж байх нь чухал. Та толинд харахдаа өөрийнхөө хүзүүг нэг ажиглаад хараарай. Хүзүүнд бамбай булчирхай байрладаг. Хүзүүнд овойсон товойсон юмгүй ч таргалсан, хавантай нүүр харагдаад байвал, цусны шинжилгээнд TSH, мөн сахар үзүүлээрэй. 35-аас дээш насны эмэгтэйчүүд бол зайлшгүй үзүүл.
TSH цусанд :13-16 насны хүүхдүүдэд норм буюу байх ёстой 0.40- 9,4mU/l,
Насанд хүрэгсдэд норм 0.25-5.00mU/l
Сахар цусанд байх хэмжээ 4.1-5.9mmol/l байдаг.
Бамбайн даавар нь хүний биеийн дулааныг зохицуулах үүрэгтэй. Дааврын ялгарлын хямралаас үүсэх эмгэг нь эмэгтэйчүүдэд илүү тохиолддог бөгөөд энэ нь сарын тэмдэгтэй холбоотой. Шалтгаан нь : Хоол ундаар авах иодын хэмжээ дутагдсанаас үүсдэг. Иод дутагдсанаар дааврын үүсэл ялгарал хямарч бамбай булчирхайн доройтолд хүргэдэг байна.
Бамбай булчирхайн үрэвсэл "Базедовагийн" шинж
Даавар хэт их ялгаруулбал халуурах, халуу шатах шинж тэмдгээс гадна бамбайн булчирхай томрох, нүд бүлтийх, гар салгалах, халуу шаталтын улмаас биеийн булчин шөрмөс нь агшиж, багасдаг. Ингэснээр турж эцэж эхэлнэ. Зүрхний цохилт үргэлж 90-ээс дээш цохилж, хордлогын шинжтэй. Нүд бүлтгэрдүү болно. Гуурсан хоолой уян болж, амьсгаа давхцах, хурхирах ихэсдэг. Сэтгэл санаа маш тогтворгүй болж, амархан уурлах, гомдох гоморхох ихэснэ.
Цусанд TSH бамбай булчирхайг өдөөгч шинжилгээ ихсээд байвал
"Тиротропин" дааврын дутагдал болно. Өөрөөр хэлбэл бамбайн булчирхайн үйл ажиллагаа суларсан байна.
Шинж тэмдэг нь : Энэ үед таргалах, нүүр хавантаж, нүд бэлцийх, хөл гар өглөө босох бүрт хавагнаж атгаж болохгүй байх, сэтгэл санаа тогтворгүй, хөлрөлт ихтэй, цусны даралт ихсэх, цусанд сахар ихсэж, "Чихрийн шижин" өвчний эхлэл болно. Эмэгтэйчүүдэд 45 наснаас дээш голдуу илрэх тул "Насны тарга" гэж нэрлэдэг. Энэ үед Л тироксин бэлдмэлийг хэрэглэж хэвийн байдалд орохгүй бол тархины цусан хангамж муудаж, зан төрөхийн өөрчлөлт гарч, цус харвалт өгөх хүндрэл гардаг.
Бамбайн булчирхайн үйл ажиллагаа сулрах олон шалтгаантай
Удамшлын, амьдарч байгаа орчин, хэрэглэж байгаа хоол хүнс, архи тамхи, эм удаан хугацаагаар хэрэглэх, сэтгэл санааны тогтворгүй байдал нөлөөлдөг.
Залуу бүсгүйчүүдэд жирэмслэх үед бамбайн булчирхай хэт ачаалалд орж, жирэмсний эхэн үеийн буюу сүүл үеийн хордлогийг үүсгэдэг. Төрсний дараа бамбай булчирхай хэвийн үйл ажиллагаандаа орно. Зарим тохиолдолд төрсний дараа бамбай булчирхайн дааврын зохицуулалт алдагдсанаас сэтгэцийн хямралд орох хүндрэл байдаг. Үүнийг "Савны хий" гэж ярьцгаадаг. Бамбай булчирхайн өвчнийг оношлохдоо цусны шинжилгээнээс гадна, ЭХО-д харж өөрчлөлтийг тогтооно. Шаардлагатай бол мэс заслын аргаар эмчилдэг. Дотоод шүүрлийн эмчид үзүүлж зөвлөгөө авах нь чухал.
Урьдчилан сэргийлэх : Хүний бамбайн булчирхайн үйл ажиллагаа стресс, хорт зуршлаас амархан үйл ажиллагааны алдагдалд ордог тул зөв хоололт, давсны болон чихрийн хэрэглээг багасгах хэрэгтэй. Дээрх шинж тэмдэг илэрч байвал цусны энгийн шинжилгээгээр илэрдэг болохоор та 6 сард нэг удаа бамбайн дааврын шинжилгээ өгч үзүүлж байх хэрэгтэй.
Хүний их эмч Б.БАТ-ОРГИЛ