Арбидол эмийг коронавирусний эмчилгээнээс хассан зүйл огт байхгүйг Эрүүл мэндийн сайд С.Энхболд мэдээллээ.
Иргэдийн дунд арбидол эмийг коронавирусний эмчилгээнд ашиглахаа больсон гэх ташаа мэдээлэл тархаад буйг тэрээр залруулсан юм. Тэрбээр, "ЭМЯ-наас сүүлийн хоёр хоногийн хугацаанд энэ асуудлаар тайлбар өгч байгаа. Арбидол эмийг ковидын эмчилгээнээс хасаагүй. Зөвхөн өвөрмөц эмчилгээний заалтаас хасаж өргөн хүрээний эмчилгээний төрөлд оруулсан. Ингэснээр, ганцхан ковид биш, томуу, томуу төст өвчний үед хэрэглэх боломжтой болж байгаа юм" хэмээн тайлбар өглөө.
Мөн тэрээр, Сангийн сайд болон Эрүүл мэндийн сайдын хамтарсан тушаалаар, өрхийн хяналтад эмчлүүлж байгаа нэг иргэний эмийн багцад 7 дугаар сараас 160 мянган төгрөгийн санхүүжилт олгож байгааг тэмдэглэв. Өмнө нь багц эмийн зардал 70 мянган төгрөг байсныг ийнхүү нэмэгдүүлжээ. Тухайн эмийн багцаас гадна түргэвчилсэн тестийн нөөц бүрдүүлэх хангалттай санхүүжилт байгааг тодотгоод, коронавируст халдварын эмнэл зүйн шинж тэмдэг илэрсэн, ойрын хавьтал болсон иргэнийг өрхийн эмнэлэгтээ очиж түргэвчилсэн шинжилгээ өгөхөд үнэ төлбөргүй, бүрэн нээлттэй гэдгийг хэллээ.
Эх сурвалж: МОНЦАМЭ
