Говьсүмбэр аймгийн Сүмбэр сумын 6-р багийн нутаг Муу хөөтийн Морины энгэр гэдэг газарт малын шүлхий өвчин гарлаа.
2016 оны 7-р сарын 16-нд Муу хөөтөөс хойш Морины энгэр гэдэг газарт нутаглаж буй Төв аймгийн Аргалант сумаас нүүж ирсэн Шинэбилэг, Сэлэнгэ аймгийн Орхонтуул сумын Бямбасүрэн, Мандах нарын гурван өрхийн 140 үхрээс 21 үхэр өвчилсөн гэх мэдээллийг хүлээн авч 6 үхрээс өвчний дээж авч Улсын мал эмнэлэг ариун цэврийн төв лабораторид хүргүүлэхэд 18-ны өдөр урьдчилсан байдлаар малын гоц халдварт шүлхий өвчин гэсэн дүгнэлт гарсан байна.
Аймгийн Онцгой комисс 17,18-ны өдрүүдэд хоёр удаа хуралдсан бөгөөд Сүмбэр сумын Засаг дарга “Хорио цээрийн хязгаарлалт тогтоож, хяналтын пост байгуулах тухай” 07-р сарын 17 ны өдрийн А/85 дугаар захирамж гаргаж одоогийн байдлаар тус голомтыг бүслэн 4 пост гарган ажиллаж байна. Улсын мал үржлийн газраас 214,3 литр вакцин татан авч нийт 86632 толгой малд вакцин хийхээр ажлын 9 хэсэг гарч ажиллаж эхлээд байна.
ГОВЬСҮМБЭР АЙМГААС Д.УРАНЦЭНГЭЛ МЭДЭЭЛЛЭЭ