Ганбаатарын хувьд 2016 онд үнэмлэхүй ялалт байгуулж Засгийн эрхийг авах, 2017 онд Ерөнхийлөгчийн сонгуульд ялалт байгуулж Монгол улсын ерөнхийлөгч болно гэдгээ зарлалаа. Ганбаатар өөрийн байгуулсан ХҮН НАМ-ын даргаар сонгогдож, тамгаа хүлээн авахдаа ингэж хэлсэн. Тэр хүн дэндүү эрдэж, дэндүү эртдэж байна. Түүнийг шинээр баталсан сонгуулийн хуулиа сайн унш гэж хэлмээр байна. Ялангуяа, УИХ-ын сонгуульд сүүлийн 3 жил ТОГТМОЛ үйл ажиллагаа явуулсан улс төрийн нам оролцоно гэдэг үгийн утгыг тайл гэж хэлье. Энэ бол улсад бүртгүүлээд 3 жил болсон намыг оролцож болно гэсэн үг огт биш гэж би хувьдаа ойлгож байна. Улс төрийн намын гол зорилго нь засгийн эрхийг авахад л оршдог. Тэгэхээр сүүлийн 3 жилийн хугацаанд улс оронд өрнөсөн шат шатны сонгуульд ХҮН НАМ яаж оролцсон юм бэ? Хаана байсан юм бэ? Хамгийн сүүлд, Багануур, Налайх дүүрэгт болсон орон нутгийн сонгуульд ХҮН НАМ-ын сураг ч гараагүй. Улс төрийн намын тогтмол үйл ажиллагаа бол тайлан бүртгэл биш, сонгуульд үзэлцэх, эрх мэдлийн төлөөх тэмцэл юм. Тэгэхээр, Ганбаатар та, өөрөө ард нь байсан ХҮН НАМ-аа сонгуульд оролцох эрхийг нь хаасан хуулийг батлалцсан юм биш үү. Энэ өнцгөөс шүүвэл, ХҮН НАМ энэ удаагийн сонгуулийг өнжих бүрэн магадлалтай. Хэрвээ өнжсөн тохиолдолд 2017 оны ерөнхийлөгчийн сонгуульд ч оролцох эрхээ давхар хаалгалаа гэсэн үг. Та өөрийнхөө мөрөөдөлд цэг тавьсан ийм л хууль баталжээ.
Ц.ЭНХБАТ