Дархан-Уул аймгийн Иргэдийн Хурлын төлөөлөгч Х.Батбаяр хотынхоо тохижолтонд хувь нэмрээ оруулж, орон сууцны 16 давхар байрны оршин суугч иргэдийн амар тайван тав тухтай амьдралыг нь хангахад туслан, хувиасаа 6 сая төгрөг гаргаж иж бүрэн 20 камерийн хяналтын систем суурилуулснаа хүлээлгэн өглөө.
Ашиглалтанд ороод дөчин жил болсон Дархан хотын хамгийн өндөр энэ барилгын камержуулалтын ажил дуусч нээлтэнд нь, аймгийн ИТХ-ын дарга П.Эрдэнэбат ирж оролцон нэг төлөөлөгчийнхөө санаачилсан ажлыг үзэж танилцан, хотын иргэдийн өмнөөс талархал илэрхийлэв. Энэ хуучин байрыг гадна дотноос нь бүрэн хяналттай болгосноор оршин суугчид орой үдэш амар тайван орж гарах боломжтой болж, цахилгаан шатны хэвийн ажиллагаа хангагдахад тусалжээ. Байрны давхар бүрт мөн гадна талын дөрвөн буланд зоосон нийт 20 камерын хяналт нь 24 цагийн байнгын ажиллагаатай учраас эндхийн багийн удирдлага, Сууц Өмчлөгчдийн Холбоо, Цагдаагийн хэлтэс техник төхөөрөмжийн ашиглалтыг нь бүрэн хариуцаж ажиллах үүрэг хүлээлээ.
БЭЛТГЭСЭН : Ө. РАГЧААСҮРЭН
