Сонгуулийн хууль, сонгуулийн шинэ хууль "Төрийн мэдээ" сэтгүүлд хэвлэгдэж албажлаа. СЕХ-ны дарга Ч. Содномцэрэн УИХ-ын сонгуулийн өдрийн товыг 2016 оны 6-р сарын 29 гэж зарлалаа.
Шүгэл тасхийж, намууд гараанаасаа гарах цаг боллоо. Гэтэл энэ хууль ямар хууль болов оо? Бид чинь ямар дүрмээр тоглох гэж байгаа билээ ? гэдгээ парламентад суудалгүй байтугай, суудалтай нь ч бодох цаг болсныг ухааруулжээ.
"Энэ хууль бол эрх баригч 2 том намын бусдыг басамжилсан хууль. Оролцоод үз л дээ. Сонгогдохыг чинь харья" гэж байна хэмээн сонгуулийн шинэ хуулийн үзэл санааг МУНН-ын дарга Б.Батболд шүүмжиллээ. Түүнтэй ижил санааг Иргэний Хөдөлгөөний Намын ерөнхий нарийн бичгийн дарга Д. Сүхжаргалмаа хуваалцаж байна. " Сонгуулийн шинэ хууль маш харгис хууль болсон.Ерөнхийдөө том гэх 2 намыг авч үлдэхээр, бусад улс төрийн хүчнийг оролцуулахгүй байхаар зохицуулсан" гэж шинэ хуулийн үзэл баримтлалыг тодорхойллоо.
Энэ байдлаараа ИЗНН, МАХН ч парламентад суудлаа нэмэх биш, хадгалахад ч хүнд болсон тухай шинжээчид дүгнэж байна.
Шүглийн дуунаар улс төрийн намууд гараанаас гартал шүглээс өмнө хөдөлсөн АН, МАН аль хэдийн барианд орж харагдана.
Ц.ЭНХБАТ