Мишээл экспо төвд үргэлжлэх Барилгын үзэсгэлэн худалдаанд оролцож буй барилгын компанийнхан ингэж хэлж байна. Бүтэн долоо хоноход ганц ч байр борлуулж чадсангүй гэж "Гангар инвест" барилгын компанийн борлуулалтын менежер Ц.Одонтуяа хэллээ. Хүмүүсийн худалдан авах чадвар эрс буурсан, Монголынхоо эдийн засагт итгэл алдарсан нь ажиглагдлаа гэж тэрбээр 7 хоногийнхоо ажлыг дүгнэлээ. Иргэд ямар байрыг сонирхож байгааг судлах, тусгайлан судалгаа хийх шаардлага алга гэж борлуулагчид анзаарчээ. Иргэд бага талбайтай, хямд үнэтэй, зээлийн байрыг л түлхүү сонирхож байгаа аж. Гэхдээ л сонголт хийж, гэрээ байгуулахдаа туйлын хойрго байгаа нь, иргэд итгэл алдарсан, бэлэн мөнгөний хомстолд орсонтой шууд холбоотой гэж мэргэжилтэнүүд үзэж байна.