ОХУ-д суралцаж байгаа манай сонсогч нар "Монгол цэргийн өдөр", орчин цагийн Зэвсэгт хүчний 95 жилийн ойн хүрээнд хэд, хэдэн арга хэмжээ зохион байгуулжээ. Тухайлбал, өчигдөр Москва хот болон Санктпетербург хотноо тус улсад Үндэсний аюулгүй байдлыг хангах тусгайлсан чиг үүрэг бүхий байгууллагуудаас суралцаж буй офицеруудын дунд сагсан болон гар бөмбөгийн нөхөрсөг тэмцээнийг амжилттай зохион байгуулсан байна. Москва хотноо зохион байгуулагдсан сагсан бөмбөгийн тэмцээний нээлтийн ажиллагаанд Монгол Улсаас ОХУ-д суугаа ЭСЯ-ны Хэргийг түр хамаарагч Ч.Баттөмөр, Батлан хамгаалахын атташе бригадын генерал Г.Энхбаатар, Консулын хэлтсийн дарга Ц.Ганболд, Элчин сайдын I нарийн бичгийн дарга хурандаа П.Буянхүү нар урилгаар оролцов. Мөн оросын хөгжмийн академид суралцаж буй ЦДБЭЧ-ын гоцлол дуучин СТА Ч.Бадрал, гоцлол хөгжимчин СТА Х.Ариунсайхан нар баг тамирчдад амжилт хүсэж ая дууны мэндчилгээ дэвшүүлжээ.
Нээлтийн ажиллагааны үеэр ОХУ-ын цэргийн их, дээд сургуульд суралцаж байгаа бүрэлдэхүүнээс сурлага сахилга, урлаг спортын амжилтаараа тэргүүлсэн ахлагч М.Төгөлдөр, дэд ахлагч Г.Гантулга, Ц.Хишигсүрэн нарт шагнал гардуулав.
Тэмцээн ширүүн өрсөлдөөнтэй явагдсаны үр дүнд "Хил хамгаалах байгууллага"-ын офицеруудын баг тэргүүн байрт шалгарч алтан медаль, өргөмжлөл, мөнгөн шагналын эзэн болов. Цэргийн баярыг тэмдэглэн өнгөрүүлэх төрөл бүрийн арга хэмжээ төлөвлөгөөний дагуу оросын бусад хотуудад үргэлжлэн явагдах юм байна.
Эх сурвалж : Монгол Улсын Батлан хамгаалах яам
