Энэ тухай эдийн засагчид мэдэж байгаа ч дуугарахгүй, болгоомжилж байна. Үе үе Р.Амаржаргал, М.Энхсайхан нар л иргэдийг цочтол хэлэх юм. Хааяа нэг Бямбасүрэн гуай. Эдийн засаг хямраад зогсохгүй, дампуурсан улс орон болох аюул ойрхон байна гэж М.Энхсайхан хэлээд авлаа. Түүний өмнөхөн Р.Амаржаргал "5 хувийн зээлийг өгч чадах банк манайд бий юу? Байвал гараа өргөдөө" гэж асуухад төрийн ордонд очсон банкныхны нэг нь ч "Чадна" гэж гараа өргөөгүй. Тэгээд л хүч түрсэн улстөрийн шийдвэрийг банкуудад тулгасан. Түүний үр дагавар юу болохыг эдийн засагчид мэдэхээс, шийдвэр гаргасан улс төрчид мэдэхгүй, тэгээд ч хариуцахгүй. Сонгуулийн дараа байгуулагдах Засгийн газар Монголын түүхэнд тохиогоогүй хүндрэл бэрхшээлтэй тулгарах нь ойлгомжтой гэж эдийн засагчийн хувьд Энхсайхан дүгнэлээ. Эдийн засгийн таамгийг хэлээд байгаа М.Энхсайхан,Р.Амаржаргал хоёр бол хоёулаа эдийн засагч төдийгүй, хоёулаа АН-ын дарга байсан төдийгүй, хоёулаа Монгол улсын ерөнхий сайдаар ажиллаж байсан хүмүүс. Бямбасүрэн гуай ч мөн ижил эдийн засагч, мөн ерөнхий сайдаар ажилласан. Энэ бүгдийг бодохлоор, 2016 оны УИХ болон Орон нутгийн сонгууль Монголчуудын хувьд хэр ач холбогдолтой сонгууль вэ? гэдэг нь ойлгогдож байна. Улс төрчид улс орныг авч явдаггүй юм байна, удирдагч хүн улс орныг жолооддог юм байна, дахин хэлэхэд.
Ц.ЭНХБАТ