ММС компани зээл, санхүүжилтүүдийнхээ нөхцөлд өөрчлөлт оруулж байгаа тухайгаа мэдээллээ. Тухайлбал, олон улсын зах зээлд гаргасан 600 сая ам.долларын бондын эргэн төлөлтийн нөхцлийг өөрчлөхөөр бонд эзэмшигчидтэйгээ хэлэлцэж эхэлсэн бөгөөд бонд эзэмшигчид нь энэ асуудлаар төлөөллийн хороо байгуулж, мэргэжлийн зөвлөхүүдийг томилон ажиллуулж байгаа аж. Мөн олон улсын хэд хэдэн банк ММС-ийн зээлийн нөхцлүүдийг өөрчлөх, хугацааг хойшлуулах зөвшөөрлийг олгосон байна. Ийнхүү зээл, төлбөрийн нөхцлүүдээ өөрчилснөөр хямралын үед үйл ажиллагаагаа зогсоолгүй явуулах, санхүүгийн байдлаа тогтворжуулах боломжийг томоохон компаниуд өөртөө нээдэг. ММС нь Монголоос олон улсын зах зээлд хувьцаагаа гаргасан анхны компани. Энэ утгаараа санхүү, зээлийн бүх үйл ажиллагаа нь олон улсын хөрөнгийн зах зээлийн зарчмаар явагддаг. 2012 онд тус компани гадаад зах зээлд 8.875 %-ийн хүүтэй, 600 сая ам.долларын бонд гаргаснаас гадна Европын Сэргээн Босголт Хөгжлийн Банк, BNP Paribas зэрэг олон улсын томоохон банкуудаас зээл, санхүүжилт авч дэд бүтцийн төслүүдээ хэрэгжүүлсэн юм.
Х.АЯЛГУУ
