БОАЖ-ын сайд Н.Цэрэнбат Европын холбооны орнуудаас Монгол Улсыг хамаарах Элчин сайдууд болон БНХАУ-ын Элчин сайдтай уулзалт хийлээ. Европын холбооны 31 улсын Элчин сайдуудтай хийсэн уулзалтынхаа үеэр Н.Цэрэнбат сайд Монголын байгаль орчин, аялал жуулчлалын салбарт тулгамдаж байгаа асуудлыг шийдэх гарц эрэлхийлж байгаагаа дуулгаад хамтарч ажиллахад таатай байх болно гэдгээ илэрхийлсэн юм. Уулзалтад оролцсон Элчин сайдууд БОАЖ-ын сайд Н.Цэрэнбаттай хамтарч ажиллана гэдгээ мөн илэрхийллээ. Тухайлбал, Грекийн Элчин сайд аялал жуулчлалыг хамтран хөгжүүлэх, агаарын бохирдлыг бууруулах асуудлаар туршлага хуваалцахад бэлэн гэдгээ мэдэгдсэн. Харин Шведийн Элчин сайд хог хаягдлын менежментийг сайжруулах, сэргээгдэх эрчим хүчийг нутагшуулах тал дээр хамтарч ажиллах сонирхолтой байгаагаа дуулгасан юм.
БНХАУ-аас Монгол Улсад суугаа Элчин сайд Шин Хайминыг хүлээж авч уулзахдаа Н.Цэрэнбат сайд салбар хоорондын харилцааг шинэ шатанд аваачих хүсэлтэй байгаагаа илэрхийлж, өмнөх Засгийн газрын үед хамтарч ажиллахаар үзэглэгдсэн ч хэрэгжээгүй ажлуудыг нэн дариу эхлүүлэхийг хүссэн юм. Энэхүү хүсэлтийг БНХАУ-аас Монгол Улсад суугаа Элчин сайд Шин БНХАУ-ын Байгаль хамгаалах яам, Усны яам, Ойн яам болон Аялал жуулчлалын яамныханд мэдэгдэхээ илэрхийлээд Н.Цэрэнбат сайдад амжилт хүслээ.
ЭХ СУРВАЛЖ:БОАЖЯ
