Дэлхийн хэмжээний гэгдэх АСЕМ-ийн уулзалтад зориулж тансаг зэрэглэлийн авто машин оруулж ирж ашиглах тухай асуудлыг УИХ-аар хэлэлцсэн нь иргэдийн дургүйцлийг нэлээдгүй хүргэсэн. Энэхүү шийдвэрийг сонссон автомашинтай иргэд санаачилга гаргаж “Лексус - 570”, “Hummer” зэрэг автомашинаараа үнэ төлбөргүй түрээслэхэд бэлэн гэдгээ илэрхийлж байсан билээ. Харин Засгийн газраас АСЕМ-ийн уулзалтад зориулж машин худалдаж авахад төсвөөс нэг ч төгрөг гаргахгүй хэмээн мэдэгдсэн. Мөн хувийн компаниуд гаднаас оруулж ирсэн автомашинаа уг уулзалтад зориулж хэрэглүүлбэл Гаалийн татвар, НӨАТ-аас чөлөөлөх боломжтой гэсэн бөгөөд энэ дагуу тогтоолыг төслийг УИХ-д өргөн бариад байсан юм. Тэгвэл Засгийн газрын 3 сарын 7-ны өдрийн тогтоолоор АСЕМ-ийн үйлчилгээнд ашиглах зориулалтаар 52 ширхэг Тоёота Приус-30 маркын машиныг онцгой албан татвар болон гааль, нэмэгдсэн өртгийн албан татвараас чөлөөлөхөөр тогтжээ. Автомашиныг “Хэт Моторс” ХХК өөрийн хөрөнгөөр импортлон оруулж ирэх бөгөөд АСЕМ-ийн уулзалтын дараа зарж борлуулах юм байна.
Х. АЯЛГУУ
