-МОНГОЛ ХҮН САНСАРТ НИССЭНИЙ 35 ЖИЛИЙН ОЙ ТОХИОЖ БАЙНА-
Өнөөдөр Монгол хүн сансарт ниссэний 35 жилийн ой тохиож байна. Монгол Улсын иргэн, сансрын нисгэгч Ж.Гүррагчаа, ЗХУ-ын сансрын нисгэгч В.А Жанибековын хамтаар 1981 оны гуравдугаар сарын 22-ны өдрийн 14.58 цагт хуучнаар ЗХУ-ын Байконуур дахь сансрын хөлөг хөөргөх талбайгаас “Союз-39” хөөрч найман өдрийн турш дэлхийг 124 удаа тойрч, гуравдугаар сарын 30-нд эх дэлхийдээ амжилттай газарджээ.
-ӨНӨӨДӨР ДЭЛХИЙН ЦЭВЭР УСНЫ ӨДӨР-
Цэвэр усны гачигдалд байгаа олон улс орнуудыг усны гачигдлаас гаргах, цэвэр усны нөөцийг нэмэгдүүлэх, арвилан хэмнэх зорилгоор 1993 оноос эхлэн НҮБ-аас жил бүрийн гуравдугаар сарын 22-ны өдрийг “Дэлхийн усны өдөр” болгон, жил бүр өөр өөр уриан дор тэмдэглэж байхаар шийдвэрлэсэн байдаг. НҮБ-ын энэ уриалгыг Монгол Улсын Засгийн газар дэмжиж, манай улс 2005 оноос хойш “Дэлхийн усны өдөр”-ийг тэмдэглэсээр иржээ.
-КАЗАК ТҮМНИЙ “НАУРЫЗЫН БАЯР” БОЛЖ БАЙНА-
Өдөр уртасч, илч дулаан нэмэгдэх цагийг бэлэгшээн тэмдэглэдэг казах түмний “Наурызын баяр” өнөөдөр тохиож байна. “Наурыз” гэдэг үг анх персийн сурвалж бичигт манай эриний хоёрдугаар зуунд бичигдсэн байдаг ч манай цаг тооллын өмнөх, барагцаалбал 648-330 оны үеэс орж иржээ. Наурыз бол шинэ жилийн эх нь бөгөөд хаврын өдөр, шөнө тэнцсэн өдөртэй давхацдагаараа онцлогтой. Наурызыг дорнодын ард түмэн ислам шашныг шүтэж эхлэхээс олон жилийн өмнө үүссэн учраас энэ баяр нь шашны зан үйл болон түүний урсгалуудаас ангид гэж үздэг.
А.САЯН
