Хэнтий аймгийн 42-р тойргоос сонгогдсон Д.Гантулга УИХ-ын гишүүний бүрэн эрхээсээ өөрийн хүсэлтээр чөлөөлөгдсөн билээ. Ингээд 42-р тойрогт нөхөн сонгууль явагдахаар болж, холбогдох хуулийн дагуу ирэх аравдугаар сарын 7-ны өдөр санал хураах товыг тогтоосон.
Тэгвэл Үндсэн хуулийн Цэц дээр гурван иргэний өргөдлийн дагуу маргаан үүсгээд байгаа бололтой. Сонгуулийн тухай хуулиар төрийн албан хаагч сонгуульд нэр дэвшихээр болбол тухайн оны нэгдүгээр сарын 1-нээс өмнө төрийн албанаасаа чөлөөлөгдсөн байх ёстой. Тэгэхээр төрийн албан хаагч нэр дэвших боломжгүй болчихоод байна. Мөн сонгуулийн зардлын дээд хэмжээг 120-оос доошгүй хоногийн өмнө тогтооно гэсэн хуулийн заалтыг зөрчсөн гэж нэр бүхий гурван иргэн гомдол гаргажээ. Үндсэн хуулийн Цэц энэ гомдлыг үндэслэлтэй гэж үзэн хэлэлцэхээр болсон байна. Хэрвээ Хэнтийн нөхөн сонгуулийн товыг тогтоохдоо хууль зөрчсөн байна гэж Цэц үзвэл 42-р тойргийн сонгууль хойшилж таарна.
Сонгуулийн санал авах өдөр хойшилбол тэр хугацаанд Хэнтийн аймгийн Жаргалтхаан, Мөрөн, Хэрлэн сумын иргэдийн төлөөлөл УИХ-д эзгүйрч, тэдний эрх ашгийн асуудал хөндөгдөнө. Магадгүй энэ хооронд намуудын улстөржилт хэрхэн туйлдаа хүрэхийг таашгүй юм.