МАН-ын Удирдах зөвлөл өчигдөр хуралдаж, хоёр гол асуудлаар шийдвэрт хүрсэн байна. Д.Гантулга УИХ-ын гишүүний бүрэн эрхээсээ түдгэлзсэнээс хойш МАН-ын нэг суудал эзгүйрээд байгаа. Хэнтий аймгийн 42 дугаар тойрогт нөхөн сонгууль болж, Д.Гантулгын оронд хэн Их хуралд суухыг шийдэхээр болсон. Энэ нөхөн сонгуульд МАН хэрхэн оролцох тухайгаа өчигдрийн хурлаар ярилцсан гэж эх сурвалжууд мэдээлж байна. Хэнтийн 42 дугаар тойргийн нөхөн сонгуулийн товтой холбоотой гомдол Үндсэн хуулийн цэцэд ирж, Цэц асуудлыг хэлэлцэхээр болсон. Тэгэхээр энэ нөхөн сонгуульд намуудын хэрхэн яаж оролцох, ямар улс төр өрнөх вэ гэдэг нь сонирхол татаж буй.
МАН өчигдрийн Удирдах зөвлөлийн хурлаараа мөн Бага хурлын товоо тогтсон байна. Хэдийгээр Удирдах зөвлөлийн 30 орчим гишүүн бүгд ирээгүй ч хуралдсан улсууд ирэх даваа гаригт Бага хурлаа хуралдуулъя гэж тогтжээ. Бага хурлаар МАН-ынхан “60 тэрбум”-тай холбоотой асуудлыг авч хэлэлцэж, намын гишүүдийн ёс зүйн асуудлыг ч хөндөж ярих нь тодорхой биз ээ.
Ц.БУЛГАН