МАХН, Иргэний Зориг ногоон нам, Монголын ногоон нам, Монголын Үндэсний Ардчилсан нам гэсэн дөрвөн нам хамтарсан мэдэгдэл гаргажээ. Тэрээр мэдэгдэлд “Монголын төр засаг сүүлийн 100 жилд тохиогоогүй гүн гүнзгий хямралд орлоо. Төрийн алба эмх цэгцгүй байдлаа алдаж, гэмт хэрэгтнүүд сүрэглэн шургадаг, тэд хууль бус үйлдлээ хамгаалуулдаг цайз болон хувирав. Монголд амьдарч байгаа иргэнийг хулгайлах, төрийн албанд ажиллаж байгаа хүнийг алах зэрэг аймшигт гэмт хэргүүд гарч түмэн олныг цочирдууллаа. Монголын төр сонгуулиас сонгуульд улам сульдан эзгүйрч зөвхөн нам дамжсан цөөн хэдхэн бүлэглэлүүдийн хоорондын наанаа тэмцэж байгаа нэртэй жүжиглэдэг, цаагуураа үгсэн хуйвалдаж эх орон, ард түмнийхээ баялгийг ханаж цадахыг мэдэхгүйгээр иддэг газар болон хувирлаа. Монгол Улсад МАНАН-гийн эсрэг тэмцдэг, дуугардаг луйвар булхайг нь илчилдэг ард түмнийхээ эрх ашгийг хамгаалдаг хүмүүс, улс төрийн хүчнүүд байна. Харин МАНАН эрх мэдлээ авч үлдэхийн тулд үхэн хатан зүтгэж өрсөлдөгч намууд, хүмүүсийг оролцуулахгүй байхын тулд элдвийн хиймэл саад бэрхшээл учруулсаар байна. МАНАН-гийн даалгавраар ИЗЗН намыг УИХ-ын 42-р тойргийн нөхөн сонгуулиар эзэн Чингисийн төрсөн нутгийнхан өөрсдөд нь муу дүн тавина хэмээн айсандаа Үндсэн хуулийн цэц мэт хууль, шүүхийн байгууллагынхныг ашиглан нөхөн сонгуулийг болгохгүй хэмээн улайран зүтгэж байна.
УИХ-ын ээлжит бус чуулганыг хуралдуулж Оюутолгойн гэрээг цуцлах эсэх асуудлаар ард түмний дунд санал асуулга явуулах, шийдвэр гаргах, 60 тэрбумын луйвар булхайн талаар олон нийтийн өмнө нээлттэй сонсгол зохион байгуулах зэрэг өнөөгийн улстөр, нийгэм, эдийн засагт тулгамдсан асуудлуудыг яаралтай шийдвэрлэхгүй бол УИХ-ыг тараах санал асуулгыг улс орон даяар өрнүүлж Хүчирхэг, Хүнлэг Монгол Улсаа сэргээн байгуулах үйл хэргийг эхлүүлэх болно гэдгээ хариуцлагатайгаар мэдэгдэж байна” гэсэн юм.
Харин МАХН-ын дарга Н.Энхбаяр хэлэхдээ “Нөхөн сонгуульд манай намаас хэн ч нэр дэвшсэн ялахын төлөө ажиллана. МАНАН-г ялахгүй бол Монгол ялагдана. МАНАН-г ялж байж Монгол ялна. Зөвхөн Хэнтий аймгийн сонгууль биш. Энэ бол монголын ард түмний сонгууль. Монголд өнөөдөр МАН, АН-аас өөр нам байхгүй юм шиг тэд бодож 26 жил жүжиг тавилаа.МАНАН-гийн бүлэглэл аливаа сонгуульд хүнийг нь эсвэл намыг нь оролцуулахгүй гэж хасдаг боллоо. Бүр сүүлдээ сонгуулийг нь хасдаг байдлаар монголд өнөөдөр ардчилал, хариуцлагатай төр бий болгож чадахгүй. Нөхөн сонгуулийг яаралтай явуулж Хэнтий аймгийн 42-р тойргийн иргэдийг төлөөлөлттэй болгох хэрэгтэй. Үгүй бол МАНАН-гийнхан сонгуулийн хойшлуулах нэрийдлээр хугацаа хожиж иргэдийг асар ихээр хохироож байна. Яг ингэж албан тушаал хийцгүйрүүлдэг байдал саяын Зам тээврийн яамны хүн амины хэрэг дээр ч харагдаж байна. Үүнийг даруй зогсоож, УИХ-ыг тараахгүй бол бид гарын үсэг цуглуулах болно” гэсэн юм.
