Энэ Засгийн газар "чадамжгүй" гэсэн үнэлгээг нэгэнт сонссон. "Өөрийнхөө Засгийн газраа унагаад баймааргүй байна шүү дээ" гэж У.Хүрэлсүхийн чихэнд шивнэх гишүүдийн тоо нэмэгджээ. Ийм засгийн газартай удсанаас, унагасан нь дээр гэх үзэл баримтлалыг АН төдийгүй, МАН-ын үлдсэн 32-ын бүлэг илэрхий дэмжих болсон. Дараачийн ерөнхий сайдын ч нэр дуулдаж эхлэв. Ерөнхий сайд Хүрэлсүх намтайгаа ч, засагтайгаа үлдэх нүүдлийг хийж эхэллээ. Тэр ямар ч гэсэн бүдүүн бүлэгтээ эхний буултаа хийлээ.
УИХ-ын бүдүүн 64-ийн бүлгийн сэтгэлд нийцсэн төсвийг өргөн барилаа, Ү.Хүрэлсүх, Хүрэлбаатар нар. Гишүүн бүрт мөнгө тараагаагүй ч, гишүүн бүрийн тойрогт 5 тэрбум төгрөг хуваарилсан ая тал зассан улсын төсвөөр УИХ-ын гишүүдийг " зулгуйдлаа". Өөрөөр хэлбэл, өөрийгээ ч, кабинетаа ч түр торгоох зорилго агуулсан ийм нэг хэврэг төсвийг улсын төсөв хэмээн ичгүүр сонжуургүй нэрлэн барьж чадлаа. Ингэснээрээ, МАН-ын гишүүдээс бүрдсэн 64-ийн бүдүүн бүлгийнхээ Засгийн газрыг унагах бодлыг сааруулсан байж магад. Төсөв яаж ч шийдэгдсэн бай Засгийн газрын үйл ажиллагааг хянах Монгол улсын ерөнхийлөгч, парламент дахь сөрөг хүчин, чөлөөт ард гэж бас бий. Тэд хяналт, шахалтаа үргэлжлүүлнэ. Мөн өөрийн намын нь 32-ын бүлэг сөргөлдсөн хэвээр. Энэ галыг унтраахын тулд 4-5 сайдаар " туг тахих" асуудал бүлгүүдийн хооронд үүссэн тухай мэдээлэл ордноос халиад удаж байна. "Шүд сугалах" буюу кабинетийн гишүүдээс " нэг хэсгийг нь цөмөх" жагсаалтад Эрчим хүчний сайд Даваасүрэн, Боловсролын сайд Цогзолмаа, сангийн сайд Хүрэлбаатар, Эрүүл мэндийн сайд Саранчимэгийн нэр дуулдаж эхэллээ.
Ц.ХИШГЭЭ