Өөрөө найруулж, өөрөө гол дүрд нь тоглосон, тун сүржин эхлэлтэй, хачин даржин төгсгөлтэй ийм нэгэн улс төрийн концерт дундаа ч хүрэлгүй төгсөх тийшээ хандав. Цагаан морь унасан, ардын баатрын дүрээр гарч ирсэн У.Хүрэлсүх үзэгчдийн сэтгэлийг тэр нэгэнт булааж чадахаа больжээ. Тэр олигтой гол дүр байж чадсангүй. Тунгаахад, гол дүрд тохирох ч жүжигчин биш байжээ. Хамгийн гол нь тэр зорилгоосоо хазайсан. " Авилгачдыг сөхрүүлнэ" гэсэн амлалтаасаа няцлаа.
"-Авсан зээлээ буцаачих. Ард иргэдээс уучлал гуйчих. Тэгвэл УИХ-д дахин нэр дэвшүүлнэ" гэж УИХ-ын чуулганы индрээс үг хэллээ. Энэ юу гэсэн үг вэ? "Авилгачдыг сөхрүүлэх" гэсэн үгнээсээ тэр няцлаа. Няцаад зогсохгүй, "Авилгачдын толгойг иллээ". У.Хүрэлсүх " Шударга ёсыг тогтооно" гэсэндээ хүрсэнгүй.
Тэр өмнөх удирдлагын адил албан тушаалдаа шигдэхийг хүсэж байна. Тэр улс төрийн хариуцлага тооцож чадсангүй. Авилгад орооцолдсон УИХ,Засгийн Газрын гишүүдэд улс төрийн шийтгэл оноож чадсангүй. Тиймээс концерт эхлэхэд пиг байсан театрын танхимыг үзэгчид нэг нэгээрээ орхин гарч буйг тэр өөрөө харж байна. Түүний концертийн төгсгөлийг хүлээж тэсэхгүй гэдгээ үзэгчид илэрхийлж байна. Бүр концертоо зогсоохыг Хаянхярваагаас өгсүүлээд шаардаж, гарын үсэг цуглуулж эхлэв.
Энэ гарын үсгийн тоо У.Хүрэлсүхийн 32-ын багцыг давах нь ердөө л цаг хугацааны асуудал болон үлдсэн байна. Хүрэлсүх сэнтийдээ тогтох сүүлчийн давшилтаа хийж байна. Тэр бол УИХ-ын даргыг " авч хаях". УИХ дахь МАН-ын бүлгийн дарга, өөрийг нь эсэргүүцэгч Хаянхярвааг тэр 32:27 харьцаагаар " хүчиндэж" чадсан ч, УИХ-ын дарга М.Энхболдыг унагах нь хөг нь унтарсан байна. Хаянхярвааг хүчээр унагасны маргаашаас У.Хүрэлсүхийг огцруулах саналд МАН-ын УИХ дахь гишүүд идэвхийлэн гарын үсэг зурж эхлэв. Энэ гарын үсэгт у.Хүрэлсүхийн 32-ын бүлгээс ч Бат-Эрдэнээс өгсүүлээд нэгдэнэ гэдгээ илэрхийлсээр. У.Хүрэлсүхийн концерт ийнхүү өндөрлөх тийшээ ханджээ.
Ц.ЭНХБАТ