У.Хүрэлсүхийг "нугаслана". Ерөнхий сайдын сэнтийнээс У.Хүрэлсүхийг унагах тоолуур нэгэнт ажилласан. Түүнийг мянган бурхан хүрээлээд ч нэмэр болохоо өнгөрсөн. МNВ ч, Ийгл телевиз ч зүтгээд нэмэр болж чадахгүй. Засгийн газрыг огцруулах МАН-ын М.Энхболдын талыг баримтлагчид болон АН-ын улс төрийн шийдвэр нэгэнт гарсан. Тэр юунд алдав? -Би хамгийн хүчирхэг Засгийн газар байгуулна гэсэн. Юунд ч доргихгүй гэж У.Хүрэлсүх хэлж, УИХ-ын гишүүдэд Засгийн газрын гишүүдийн давхар дээлийг нөмөргөсөн. Тэгснээрээ хүчирхэг, доргишгүй, унашгүй бат бат бөх Засгийн Газар байгууллаа гэж андуурсан. Энэ бол түүний хамгийн анхны эндүүрэл. Засгийн эрхийг авахын тулд намаа дотор нь хувааж, хагалсан. Түүнийгээ эвлүүлж, нэгтгэж чадаагүй нь түүний хамгийн том алдаа. Тиймээс энэ цав томорч, энэ ан цав руугаа өөрөө "унахад" хүрсэн. Намаа удирдаж, УИХ-д 65 болсон боломжийг ашиглаж, улс орны хөгжилд нөлөөлөх дорвитой шийдвэр гаргаж чадаагүй. Ажлын байр шинээр бий болгож, ард иргэдийн орлогыг нэмэгдүүлж чадсангүй.
Хамгийн сүүлд Засгаа авч үлдэх ахархан бодол тээж, гишүүдэд найр тавьсан төсвийг өргөн барьсан нь түүнийг дэгээдэх гогцоо болсон. Тэр 60 тэрбумыг ярьсаар жил тойрсон бол, түүнтэй эсрэгцүүлж ЖДҮ-г гаргаж тавьснаар түүний засгийг унагах нүхийг малтсан гэж үзэх үндэслэлтэй. Тэр хамгийн Хүчирхэг Засгийн Газар байгууллаа гэж зарласан. Энэ бол өөрийгээ Хамгийн Хүчирхэг Ерөнхий сайд гэж нэрлэсэнтэй утга дүйж байна. Тэгвэл энэ хүчирхэг ерөнхий сайд, хүчирхэг Засгийн газартайгаа унах цагаа хүлээж байна. Гадаа хүйтэрч, байгалийн жамаар гол ус мөстсөн бол Монгол даяар төрийн ажил царцаж, хөшжээ. Хүчтэй ерөнхий сайд Хүрэлсүхээс тойрон хүрээлэгчид нь хүртэл зайгаа авч эхлэв.
-Би өөрөө Засгийн Газрын 50% гэж тэр хэлдэг. Хуулиараа ч тийм статустай. -Шударга ёсыг тогтооно. Авилгачдын нурууг бөхийлгөж, ард иргэдийн нурууг тэнийлгэнэ. Түүний төлөө амиа ч өгч чадна гэж цэргийн хүний ёсоор хэлж гарч ирсэн нь ард иргэдийн сэтгэлд нийцсэн.
МАНАН-гийн бүлэглэлийг илчлэх, Монголын улс төрийн цэвэрлэх зоригтой "аавын хүү" гарч ирлээ гэж түүнийг Монголын нийгэм түүнийг талархан угтсан.
Гэвч тэр ерөнхий сайд болсон эрх мэдэлд хүрсэн тэр цагаас хойш ямар нэг дорвитой алхам хийж чадсангүй. Хэлсэн ярьсандаа байж чадсангүй. Түүхэнд хүчирхэг, шударга гэж тэр бичигдэж чадсангүй.
Ц.ЭНХБАТ