У.Хүрэлсүхийн тэргүүлэх Монголын Засгийн Газрын дээсэн дөрөөн дээр дэнжигнэсэн өдрүүд үргэлжилж байна. Ард иргэд улс орноо хөгжүүлээрэй гэж МАН-ыг дэмжин, УИХ-д 65 суудалтай болгож өгсөн нь алдаа байсныг саяхнаас гүнзгий мэдрэх болов. Нэг гишүүнээ гээж, УИХ-д 64-үүлээ үлдсэн гишүүд нь 32:32-оор хуваагдаж талцсан. Тэд намаа биш бүлэглэл, сонирхлоо дагасан.
2016 оны УИХ-ын сонгуулиар "Төрийг тогтвортой байлгана, мэргэжлийн Засгийн Газар байгуулна, ард иргэдийн амьдралыг дээшлүүлнэ" гэж амлан иргэд сонгогчдоос дэмжлэг авсан ч, амлалтаасаа ухарсан. Улс орны, намын эрх ашгаасаа дээгүүр хувийн эрх ашгаа тавьдаг гэдгээ нэгэнт харуулсан. УИХ ч тэр, бий болгосон Засгийн газар нь ч тэр үнэн дүр төрхөө харуулсан. Бие биенийхээ бузар булай, булхай, хулгайгаа бие биенээсээ өрсөн дэлгэж буй. Нийгмийг эрүүлжүүлэх гэж биш, нэг нэгнээ ялахын тулд бие биенийнхээ булайг дэлгэж байна. Тэдний өөр хоорондын тэмцэл нь Монгол улс "хүчирхийллийн төр", "хулгайч засаг"-тай гэдгийг дэлгэлээ.
ЖДҮ-гийн асуудлаар У.Хүрэлсүхийн тэргүүлэх Засгийн Газар огцрох болзлоо хангасан. Хүрэлсүх шударга бол Засгаа огцруулах учиртай. Гэвч тэр сандал ширээ, албан тушаалтайгаа үхэн хатан зууралдаж байна. Тогтохын тулд УИХ-ын дарга М.Энхболдыг унагахыг санаархаж байна. Түүнд нь Монгол Улсын ерөнхийлөгч Х.Баттулга хүч нэмж, дэм өгч буй.
Тиймээс УИХ-ын дарга М.Энхболд, түүнтэй хамжигч, эсрэг бүлгийн толгойлогчийн нэг болох Засгийн газрын хэрэг эрхлэх газрын дарга асан Ж.Мөнхбат нарт "номхотгох цамц" өмсгөхөөр шийдсэн мэдээлэл урсаж, өмч хөрөнгийн асуудлыг нь сонирхож, "битүү сануулга" өгч эхэлсэн.
Өнгөрсөн долоо хоногт хууль хүчнийхэн идэвхийлэн ажилласан, 461 ангийнхан чөлөөгүй ажиллаж буй мэдээлэл чих дэлсэх болов. Тусгаар тогтнолын өдрийг тэмдэглэх зуур, Монголын төрийн өндөрлөгүүд өөр хоорорндоо хэрхэн тулалдах төлөвлөгөөгөө лавшруулан хэлэлцэж, завгүй өнжлөө. Тиймээс Тусгаар Тогтнолын ойд зориулсан хүндэтгэлийн 256 хүчит бөхийн барилдаанд ерөнхийлөгч, ерөнхий сайд, УИХ-ын даргын хэн хэнд нь саатах зав байсангүй. Энэ долоо хоногийн тэмцэл тэдний хувь заяаг шийдвэрлэнэ.
Тусгаар тогтнолын баярын өдрөөр дарга нар мэндчилгээ дэвшүүлдэг уламжлалыг тэр эвдэв. Төрийн ордонд МNВ телевизийг дуудаж ярилцлага өгөв. Тэгэхдээ ярилцлага гэхээсээ илүү мэдэгдэл хийлээ. Гол нь -Намайг оролдож болно. Монголын төрийг бусниулж үл болно. Та нарын элдэв өнгийн шахалтаар УИХ-ын даргын албан тушаалаасаа буухгүй. Төрөөрөө бүү оролд гэдэг үгийг Ерөнхийлөгч Х.Баттулга, ерөнхий сайд У.Хүрэлсүх нарт хаяглалаа. Би ажлаа өгч үзсэн. Ерөнхий сайд байхдаа С.Баярт тамгаа гардуулж байсан. Хариуцлагаа үүрч, хүлээж сурсан. Ерөнхийлөгчийн сонгуульд амжилтгүй оролцсоны дараа МАН-ын даргын сонгуульд дахин нэр дэвшихээс татгалзсан.
Харин өнөөдөр УИХ-ын даргын үүрэгт ажлаас саналаараа огцроно гэдэг бол ажлаас, хариуцлагаас зугтахтай ижил. Тиймээс би хариуцлагаас зугтахгүй гэж тэр мэдэгдлээ. Түүнд Тусгаар Тогтнолын үндэсний бөхийн барилдаанд саатах зав гарсангүй.
Энэ хүн ерөнхий сайд болсноосоо хойш сүүлийн хоногуудад унтах нойроо умартан "ажиллаж" буй.
Нэгдүгээрт Засгаа тогтоох, хоёрдугаарт, М.Энхболдыг суудлаас нь унагах. Бүхий л арга чаргыг тэр хэрэглэж буй. Намаа атгаж, зангидаж чадахаа больсон учир иргэд, төрийн бус байгууллага, хэвлэл мэдээлэл рүү хандаж, тус дэм эрж буй. Хууль, хүчнийхэн ч цаг завгүй ажиллаж буй. Но-г нь илрүүлэх, нотлох баримт олохыг тэр шаардаж буй. Харин энэ өдрүүдэд ЖДҮ-д холбогдсон сайд нарын тоо нь нэмэгдсэн нь түүнд асуудал ургуулж, Засгийг аврах асуудлыг хүндрүүлсэн.
Х.Баттулга. Хүрэлсүхтэй хүч хавсайдаж буй. 60 тэрбумын хэрэг хаагдсан ч Хүрэлсүхийн даалгавраар ТЕГ энэ хэргийг дахин сөхсөн. Засгийг хамгаалах, УИХ-ын даргыг унагах ажилд түүний өмчийн С-1 телевиз идэвхийлэн оролцож буйг иргэд бэлхнээ харж буй. Тусгаар Тогтнолын ойд зориулсан хүндэтгэлийн Үндэсний хүчит бөхийн барилдаанд оролцох зав түүнд олдоогүй.
Ц.ЭНХБАТ
