Зөвхөн М.Энхболдыг УИХ-ын даргын суудлаас унагах зорилгоор баталсан хууль нэгэнт хэрэгжиж эхэлсэн. УИХ-ын дөрвөн гишүүн Байнгын хороонд өргөдөл гаргаснаар М.Энхболдыг огцруулах үйл ажиллагаа эхэлнэ. Улмаар энэ долоо хоногийн төгсгөлөөр УИХ-ын чуулганаар эцэслэнэ. Ямар шийдвэр гарах нь нэн ойлгомжтой. Харин албан тушаалаасаа буух М.Энхболд хариу ямар нүүдэл хийх вэ? гэдэг нь анхаарал татаж байна. Намаа, хотоо, УИХ-аа алдсан, ирэх өдрүүдэд УИХ-ын даргын албан тушаалаасаа хагацсанаар М.Энхболд улс төрийн бүх эрх мэдлээ алдах болно. Түүний толгой дээр бөөн хар үүл хөшиглөх болно. Тэгвэл өөр дээрээ буух аянгийг тэр хэрхэн зайлуулах бол гэдэг тунгааж бодох л зүйл. Алдагдсан бүхнийг эргүүлж авах ганцхан арга зам түүнд үлдсэн. Энэ бол УИХ-ыг тарааж, ээлжит бус УИХ-ыг зарлах. Үүний тулд үлдэх хэд хоногт ухаанаа уралдуулах болов уу? УИХ дотроос АН-ын дарга С.Эрдэнэ, гаднаас МАХН-ын дарга Н.Энхбаяр түүнийг дэмжиж буй.
Өөрийн нь халаасны 20 гишүүн буй. Тэд УИХ-ыг тараах санал дэвшүүлж, гарын үсэг цуглуулж эхэлсэн. Энэ тоо 19 хүрэхэд л УИХ чадамжгүй болж, тарах магадлал бий, хуулиараа. Өөрөөр хэлбэл 57, түүнээс доош гишүүнээс УИХ бүрдвэл чадамжгүйд тооцох хуулийн заалттай. Тэгэхээр 20 гишүүн гарын үсэг зураад гишүүнээсээ татгалзахад энэ УИХ өөрөө тарчих үндэслэл харагдаж байна. Тарахгүй байх нэг гарц бий: Тэр бол өргөдлөө өгөн гарсан гишүүдийн оронд нөхөн сонгууль явуулж болох. Үүнийг аль аль тал нь нягталж буй нь мэдээж. Ажиглавал, хуулийн зүйл ангийн тоглолт л үлдсэн. Хуульд, сонгуулиас жилийн өмнө дахин сонгууль явуулах эрхгүй гэсэн заалт бий. Өөрөөр хэлбэл 20 гишүүн 2019 оны 6-р сард УИХ-аас гарваас энэ УИХ тарах нь ойлгомжтой болж байна. Ийм нөхцөл байдал үүссэн байна. Байдал хэрхэн өрнөхийг харах л үлдлээ.
Ц.ЭНХБАТ
