Идэр есийн жавар тажигнасан энэ өдрүүдэд хүйтний эрч өдрөөс өдөрт чангарч, цас бага багаар нэмэгдэн, шуурч хатуурсаар мал бэлчээргүй болж өнөөдрийн байдлаар хойд бүсийн сумд зудын байдалд хэдийнээ орчихоод байна. Завхан аймгийн хойд сумдууд болох Асгат,Түдэвтэй Нөмрөг, Баянхайрхан, Сонгино сумын нийт нутгаар тал газраа 25-30 см, ууландаа 35-40, гуу жалгандаа 40-с дээш см-ын зузаан цастай, цас нь шуурч хатуурсаар мал бэлчээрлэхэд хүнд болжээ. Одоогоор малчид өөрсдийн бэлтгэж нөөцөлсөн хадлан тэжээлийг малдаа өгч, жижиг болон төллөх малаа тэжээж эхэлсэн байна. Өвлөөсөө хаврын сарууд хүндхэн үргэлжилдэг, дээр нь цаг агаарын урьдчилсан мэдээгээр ойрын өдрүүдэд ихэнх нутгаар цас орж, хүйтний эрч эрс чангарах талаар мэдээлж байна. Дэндүү хүйтэн, цас ихтэй, цасныхаа дор малд өл залгуулах өвсгүй, дээр нь монголд нүүрлэсэн санхүүгийн хямралаас шалтгаалан гар дээрээ бэлэн мөнгөгүй ийм л Зуд хөдөөд үргэлжилж байна.
