Өнөөдөр 2015 оны авлигын төсөөллийн индексийн дүнг дэлхий даяар зарлалаа. Судалгаанд нийт 168 орон хамрагдсан байна. Судалгаагаар тухайн орнуудын төрийн албан дахь авлигын төсөөллийн дүнг харуулдаг юм. Энэхүү судалгаанд хамрагдсан орнуудыг "0-100" оноогоор дүгнэдэг. "100" оноо авбал авлигагүй гэж үздэг бол "0" оноо авбал өндөр авлигатай орны тоонд ордог байна. Судалгаанд хамрагдсан орнуудын гуравны хоёр нь "50" онооноос доош оноо авчээ. Энэ нь авлигын асуудал дэлхий дахинд ноцтой асуудал хэвээр байгааг харуулж байна. Дани улс сүүлийн 2 жилд хамгийн өндөр оноо авч авлигагүй цэвэр орноор тодорсон бол Хойд Солонгос, Сомали улс найман оноо авч баян ходоод болжээ.
Манай улсын хувьд :
2012 онд 36 оноо авч 94-р байр
2013 онд 38 оноо авч 83-р байр
2014 онд 39 оноо авч 80-р байр
2015 онд 39 оноо авч 72-р байранд оржээ.
Эндээс харахад 2015 онд найман байр урагшилсан юм шиг харагдаж байгаа боловч бодит байдал дээрээ авлига яг хэвээрээ байгааг авсан онооноос нь харж болно. 2014 оны судалгаанд нийт 175 орон оролцсон бол 2015 оны судалгаанд 168 орон оролцсон. Мөн авлигийн индексийг тооцоолох аргачлал өөрчлөгдсөн нь найман байр урагшилахад нөлөөлсөн гэхэд болно. Манай хөрш орнуудын хувьд :
ОХУ
2013 онд 28 оноотойгоор 127 байр
2014 онд 27 оноотойгоор 136 байр
2015 онд 29 оноотойгоор 119 байр
Хятад улс
2013 онд 40 оноотойгоор 80 байр
2014 онд 36 оноотойгоор 100 байр
2015 онд 37 оноотойгоор 83 байранд тус тус оржээ
Авлигагүй орнуудын нийтлэг шинж нь : Хэвлэлийн эрх чөлөө, төсвийн зарцуулалтад иргэдийн тавих хяналт хүчтэй, шүүх засаглал нь шударга, баян ба ядуу хүмүүст тэгш хандах, төрийн бусад байгууллагаасаа хараат бус байдаг.
Авлига ихээр дэлгэрсэн орнуудын нийтлэг шинж нь : Дайн тулаантай, засаглал нь сул, цагдаа ба шүүх засаглал нь сул ямар нэг зүйлээс хараат, хэвлэлийн эрх чөлөө сул зэрэг шинж ажиглагджээ.
СУРВАЛЖИЛСАН : П. ОЮУНСҮРЭН
