Улаанбаатарын өвлийн наадам гурав дахь жилдээ зохион байгуулагдах гэж байна. Энэ сарын 6-нд буюу маргааш Үндэсний цэцэрлэгт хүрээлэнд болохоор товлогджээ. Наадмын үеэр урлагийн тоглолт, мөсөн шагайн харваа, уран гулгалт, тэшүүр, мэргэжлийн снөүборд, шүхрийн үзүүлэх тоглолт, мөсөн хананы авиралт зэрэг уламжлалт болон орчин үеийн спорт, биеийн тамирын олон үйл ажиллагаа зохион байгуулагдахаар төлөвлөгдөөд байна. Наадамд хүрэлцэн ирсэн иргэд болон жуулчид үзэж сонирхоод зогсохгүй өөрийн биеэр дээрх тэмцээнд оролцох боломжтой. Мөн нохойтой чарга, бүргэд, морь, тэмээ унан зургаа даруулах нөхцөлийг бүрдүүлж өгөх юм байна. Энэхүү наадам нь гадаад дотоодын жуулчдад Монголынхоо ёс заншил, өв уламжлал, соёлыг сурталчлан таниулахын зэрэгцээ шинэ тутамд хөгжиж байгаа биеийн тамир, спорт, аяллын төрлүүдийг иргэдэд таниулах зэрэг чухал ач холбогдолтой. Мөн цаашид Японы Саппоро, БНХАУ-ын Харбин зэрэг өвлийн хотын цас мөсний баярын нэгэн адилаар олон улсад таниулан сурталчлах өргөн цар хүрээтэй үйл ажиллагаа болгохыг зорьж байгаа юм байна.
БЭЛТГЭСЭН : П. ОЮУНСҮРЭН