Булганы ээж Байгаль хэлэх үгээ олохгүй, хүрэх газар, хүлээн авах хүнгүй бүдчин явна. Өдрийн сонинд хандаж, ярилцлага өгөхдөө өөрийн эрхгүй ингэж хэлжээ. Үхтэл үр харам гэдэг. Шоронд хоригдсон охиныхоо төлөө өндөр настай Байгаль гуай хийж чадах юм байхгүй учир хэвлэлд л ханджээ. Түүнийг яах гэж хорив? Түүнийг холбоотой гэдгийг нь нотолсон зэрэг мэдээ мэдэгдэл одоохондоо алга. Сонгууль болгоноор Зоригийн хэрэг сөхөгддөг. Тэр жил Цагдаагийн дарга, хурандаа Мөрөн "Намайг сонговол би илрүүлнэ" гэх утгатай үгийг хэлээд л сонгогчийн дэмжлэгийг авч сонгогдож л байсан. Тэгээд л юу болсныг бид мэднэ. Энэ удаа бас л сонгуультай холбоотой байхыг үгүйсгэхгүй. Монголын Ардчилсан Холбоог байгуулсан, Ардчиллын алтан хараацайн нэг, Монголын төлөө гэх зориг, зүрх нь цохилсон Зоригтой дэр нэгтгэж, гэр бүл болсон Булган гэгч эмэгтэй нөхрөө амь үрэгдсэний 18 жилийн дараа шоронд хоригдлоо. Түүнийг тоож байгаа ч хүн алга байх шиг, тийм л аядуу. Ганц түүний эх л сэтгэлээ урж, охинтойгоо уулзах хүслээ илэрхийлэн хаалга болгоныг мөргөн яваа аж. Түүнийг туслаач гэсэн цөхөрсөн дууг CONTROL.MN сонсож, олон нийтэд бага ч болов мэдээллийг хүргэлээ.
Ц. ХИШГЭЭ
