Хүрэлсүх түймэр унтраах, ерөнхийлөгчийн сонгуульд намаа ялагдуулсан одоогийн намын даргадаа хариуцлага тооцохыг эрмэлзэж байна гэсэн шум газар авч эхлэв. Энхболдыг яаж ийж байгаад ялна гэдэгт намын нөхөд нь итгэж байсан. Ерөнхийлөгчид нэр дэвшүүлэн М.Энхболдоос намаа салгаж авах "А" төлөвлөгөө нэгэнт нурсан тул "Б" төлөвлөгөөндөө шилжихээс хэрэгжүүлэхээс өөр зам тэдэнд үлдсэнгүй гэж хэлж болно. Энэ бол МАН-аа одоогийн удирдлагаас хариуцлага тооцох нэрээр салгаж авах хурдавчилсан буюу "цахилгаан" төлөвлөгөө юм. Энэ төлөвлөгөөг хэрэгжүүлснээр М.Энхболд, Ж.Эрдэнэбат нарыг УИХ-ын дарга, ерөнхий сайдын албан тушаалаас нь татан буулгаж, НАМЗХ-ны төлөөлөгчдийг төрийн өндөр дээд албан тушаалд томилох зорилгодоо хүрэхэд оршино гэж улс төр судлаачид дүгнэж байна.
Одоогоор бүх зүйл өрөлттэй сценарийнхаа дагуу өрнөж эхэллээ. Бага хурлаар М.Энхболдыг "хусаж" дийлэхгүй учир хүчний шинэ хуваарилалт хийхийн тулд Их Хурлаа хийх шаардлага тулгарсан. Тэгэж байж гэмээнэ удирдлагыг сонгох хүчний хуваарилалтад өөрчлөлт оруулах боломжтой. Бүх зүйл энэхүү сценариар өрнөж, НАМЗХ-ны залуучууд хэвлэлийн бага хурал хийж, МАН-ын Онц Их Хурлыг зарлан хуралдуулахыг шаардлаа. Тэд НАМЗХ бол Хүрэлсүх гэж ойлгож, бодож болно гэдгээ хэвлэлийн бага хурлын үеэр нуусангүй.
Онц Их Хурлыг энэ сарын 25-ны дотор хуралдуулах шаардлагыг МАН-ын дарга М.Энхболдод гардуулна гэдгээ мэдэгдлээ. Далайн ёроол доргиж, чичирлээ гэдэг шиг, НАМЗХ намын доргиог эхлүүллээ.
С.БЭЛЭГМАА
