Улс төр бол ойлголцол. Бид бүлэг дотроо ойлголцоно гэж итгэж байна. Ирэх даваа гарагт би намынхаа бүлгийг хуралдуулахаар гишүүддээ зар тарааж байна. Энэ засгийг алдаагүй ажилласан гэж хэлэхгүй. Гэхдээ л эдийн засгийг тогтворжуулах талаас хийсэн бүтээсэн зүйлтэй, эерэг үзүүлэлт нь харагдаж эхэлсэн. АН-ын бүлэгтэй эвсээд өөрийн Засгаа унагаж болно. Тэглээ гээд үлдсэн 30 нь бас гараа хумхиад зүгээр суухгүй, нөгөөдүүлийгээ ч амар тайван суулгахгүй. Тэгэхээр энэ засгийг унагавал дараагийн засаг ч мөн л хэврэг байх болно гэдгийг итгэлтэй хэлье. Эцсийн дүндээ нам итгэлээ алдаж, иргэд туйлдаж 2020 онтой золгоно гэдгийг л хэлье. Энэ огцруулах бичиг барьсан 30 бол яриад байгаа шигээ шударга гэж иргэд ойлгоод байна итгэж байх шиг байна. Суудал, албан тушаалын хүсэл сонирхолгүй гэдэг нь оргүй худал үг гэдгийг л би мэдэж байна. Тиймээс бид ойлголцох ёстой. Засгийн 1,2-р хүмүүсийг ч бүлгийн хуралд урина. Тэр хоёр хүний өөр хоорондын зөрчил Засгийн үйл ажиллагаатай хутгалдаж болохгүй. Хамгийн түрүүнд тагнасан, тагнуулсан, чагнасан, чагнуулсан гэдэг асуудлыг хуулийн байгууллага нэн яаралтай шалгаж, тогтоох ёстой.
Д.МАНДАХ