"Мэргэжлийн" гэх тодотгол бүхий, Ж.Эрдэнэбатын тэргүүлсэн засгийн газар нэг кабинет байж чадаагүй. Сайд нараа Ж.Эрдэнэбат өөрөө мэдэж томилуулсан нь үгүй. Бүх томилгоог, тэр тундаа дэд сайдыг хүртэл намын дарга М.Энхболд гардан томилж байсан байдаг. Намын даргаас "илгээсэн хүн"-ийг кабинетдаа шингээх нь л Ж.Эрдэнэбатын үүрэг байсан. Өөрөөр хэлбэл шуудайд чихсэн эвэр шиг тал тал тийшээгээ харсан сайд нартай ажиллаж байсан гэсэн шүүмжлэл дагалддаг. Зөвхөн кабинетдаа ч биш, яам яаман дотроо ч нэг зүгт харж ажиллаж чаддаггүй байсан шүүмжлэлээр Боловсролын сайдыг огцруулж байсан түүх Ж.Эрдэнэбатын Засгийн Газарт хаяглагддаг.
Тэгвэл, Ж.Эрдэнэбатынхаас ялгаатай нь, Хүрэлсүхийн тэргүүлэх Засгийн Газар нь нэг зүг чигт харж, нэг гарт зангидагдсан кабинет байх нь гэсэн хүлээлт бий болжээ. Шинээр тодорсон ерөнхий сайд У.Хүрэлсүх Засгийн газрын бүтцээ эцэслэн УИХ-д танилцуулах үлдсэн. Дэд сайдтай байх эсэхийг бүтэц л шийднэ. Хэнийг улируулан үлдээх, хэнийг сайдаар томилохыг хэнээс ч асуухгүй шийдэх болсон нь У.Хүрэлсүхийн давуу тал юм гэж улс төр судлаачид дүгнэж байна. Хэдийгээр олон давуу тал ажиглагдаж байгаа ч , юу хийх нь, юу хийж чадах нь олны анхаарлыг татсан хэвээр.
Ц.ХИШГЭЭ