.JPG)
Намын бага хурлын үеэр ийм нэгэн уур амьсгал давамгайлжээ. Нэг хүний диктаторшип буюу, нэг хүний ноёрхол хаанчлалыг устгахыг намын бага хурлын гишүүд зорьсон. Түүнтэй хариуцлага тооцох нь зөв гэж УИХ-ын 30 гаруй гишүүн толгойлсон намын бага хурлын 300 гишүүн сэтгэл шулуудсаныг бид харсан. Тиймээс М.Энхболдын гар хөл болсон Засгийн газрыг түлхэн унагаж, ерөнхий сайдад У.Хүрэлсүхийг дэвшүүлсэн үйл явдал өрнөлөө.
Эхний удаад түүнээс Засгийг нь авсан. Намын дарга М.Энхболдын оролцоогүйгээр Засгийн газраа байгуулах эрхээ У.Хүрэлсүх ийнхүү халааслав. Засаг М.Энхболдоос хамааралгүй болох нь энэ. 11-р сард хуралдахаар төлөвлөсөн Намынхаа Их Хурлаар М.Энхболдоос намын даргын эрх мэдлийг, тамгыг нь авна. Ингэж түүнээс намаа салгаж авахаар зэхэж байна. Энэ ондоо багтааж Төрөө ч түүний мэдлээс салгана гэж улс төр судлаачид дүгнэж байна. Улс төрийн дараалсан нүүдлийн үр дүнд М.Энхболд ба түүний багийг хаан ширээнээс түлхэн унагаснаар Монголыг залгиж буй Олигархи бүлэглэлээс ангижрах эхний алхам хийгдэнэ гэж бие даасан ажиглагчид үзэх болов. М.Энхболдыг унах цагаар тойрон хүрээлэгчид нь түүнээс дайжиж эхэлсэн байна. Энэ засгийн газрын далд ноёнтон асан, албан тушаалын хуваарь, зураглалын ерөнхий менежер, М.Энхболдын хамгийн ойрын, итгэлтэй, шадар хүн болох Бадамжунай ч М.Энхболдоос хамгийн түрүүн нүүр буруулсан гэх мэдээлэл ч бага хурлын заалнаас хальжээ.
Нэгэн цагт Монголын хаан байсан Н.Энхбаяраас нүүр буруулсан М.Энхболдод ижил төстэй хувь заяа нүүрлэжээ. Юу ч тохиолдлоо гэсэн М.Энхболдоос л намаа ч, төрөө ч цэвэрлэх ёстой гэж намын гишүүд төдийгүй, нийгэм үзсэн байна.
Ц.ЭНХБАТ
