.JPG)
Шударга ёсыг тогтооно. Ц.Элбэгдорж ингэж хэлж гарч ирсэн. Завсарлагагүй найман жил Ц.Элбэгдорж Монголын төрийг жолоодсон. Найман жилийн турш шударга ёс тогтоохыг нь Монголын ард түмэн нүдээ чилтэл ширтсэн. Тэр хэлсэн, амласандаа хүрээгүй, биелүүлээгүй. Шударга ёс тогтооно гэх далбаан дор өөртэйгээ 2009 оны ерөнхийлөгчийн сонгуульд нэр дэвшин өрсөлдсөн Н.Энхбаярыг "дарах" ажиллагааг ил, далдаас "түлхүүрдсэн" гэдэг.
Бодоход, шударга ёс тогтоох гэдгээ өөрийнхээ өрсөлдөгчийг "намнах" гэж ойлгоогүй байлтай, дөрөв дэх ерөнхийлөгч. Монголын төрийн жолоог атгах тэр найман жилийг хар дарсан зүүд мэт өнгөрүүлсэн олон арван улс төрчид болон бизнесменүүд бий. Тэднийг шүүх, цагдаа, тагнуул, авилгатай тэмцэх газар хараандаа онилсон, ард нь том хаалт байсан учир хүний эрх, шударга ёсны тухай асуудал орхигдсон байсан тухай дээр, доргүй, бүр УИХ-ын танхимд ч яригдаж байсан. Ялангуяа, сонгуулийн босгон дээр дуулгаваргүй нэр дэвшигчдийг "номхруулах", "цэвэрлэх" ажиллагааг улс төрчдийн гар хөл болсон Монголын хууль, хүчний байгууллагынхан улс төрийн захиалгаар хийж гаршсан.
Үүний нэг тод жишээ гэхэд л, ерөнхийлөгч Х.Баттулга өөрөө. Түүнийг улс төрөөс зайлуулах, УИХ-д нэр дэвших эрхийг нь хаахын тулд 2016 онд түүнд болон, түүний эргэн тойрны хүмүүст хэрэг үүсгэж, шахалт үзүүлсэн. Эрхбиш УИХ-ын халдашгүй дархан эрхтэй байсан учраас түүнийг барьж хорьж чадаагүй. Оролдлого бол байсан гэдгийг 2016 оны хавар Баянгол зочид буудалд буусан цагдаагийн десантын үйл ажиллагаа гэрчилдэг. Гэхдээ л түүнийг Баянхонгорт унагаж дөнгөсөн. Энэ бүх түүхийг иргэд санаж буй. Дарга нар нь турхирсан ч, шударга шүүгчид байсны хүчээр түүнд ял тохож чадаагүй гэдгийг ч Х.Баттулга ерөнхийлөгчөөр сонгогдсоныхоо дараахан хэлэхийг сонссон.
Тэгвэл ерөнхий сайдаар томилогдох гэж буй У.Хүрэлсүхийг ч нэг бус удаа оролдсон. Түүнийг Хадгаламж банкны хэргээр торны ард суулгах дөхсөн. ( МАНАН-гийн үед). Мөн сар хүрэхгүй хугацааны өмнө түүнд төрийн эрхийг хүчээр булаан авахыг оролдсон гэсэн зүйл заалтыг тулгасан. Ийм л үйл явц сүүлийн 1 жил гаруйн хугацаанд Монгол улсын ерөнхийлөгч Х.Баттулга, Монгол улсын ерөнхий сайд У.Хүрэлсүх нарыг жирийн нэг иргэн байх үед тохиолдож байжээ. Хэрвээ Х.Баттулга ерөнхийлөгчөөр сонгогдоогүй, У. Хүрэлсүх ерөнхий сайдад нэр дэвшээгүй бол тэдний хувь заяа хаашаа эргэх байсныг тааж хэлэхэд бэрх.
Энэ бүхэн өнөөдөр ард хоцорсон ч, хуулийг завхруулан, шударга ёсыг эвдэн энэхүү улс төрийн захиалгат үйлдлийг удирдаж, гар бие оролцож байсан хүмүүс албан тушаал дээрээ хэвээрээ байгааг санахад илүүдэхгүй. Ерөнхийлөгч Х.Баттулга, ерөнхий сайд У.Хүрэлсүх нар ард түмнээ сонсож, өөрсдийн гашуун туршлагаа санаж, Монголд шударга ёсыг тогтоох үйлсэд хувь нэмэр оруулна гэж найдах үлдэв. Мэдээж хууль, хүчний байгууллагын харьяалал, бүтцийг боловсронгуй болгохоос гадна, удирдлагын томилгоог анхаарах цаг нэгэнт болжээ.
Хамгийн түрүүнд, улс төрчдийн заавар зааварчилгаар ажиллаж, тэдний гар хөл болж ирсэн ТЕГ-ын дарга Хурц, Авилгатай Тэмцэх Газрын дарга Энхжаргал, ерөнхий прокурор Энх-Амгалан, ЦЕГ-ын дарга Энхтөр нартай хариуцлага тооцохыг иргэд, хууль хүчний байгууллагын шударга ажилтнууд хүлээж байна. Өнөөдрийн тогтолцоогоор АТГ-г УИХ, Тагнуул, Цагдааг Засгийн газар, Шүүх, Прокурорыг Ерөнхийлөгчийн ТГ хамаардаг. Тиймээс ерөнхийлөгч Х.Баттулга, ерөнхий сайд У.Хүрэлсүх нар хүч хавсарвал, улстөржсөн, намжсан, захиалгат үйл ажиллагаанд автсан хууль, хүчний байгууллагыг эрүүлжүүлэх итгэл найдвар бий болжээ.
Ц.ЭНХБАТ
