Монгол улсын 1, 3-р хүмүүс нэг зүг чигт харж, ижил зүйлийг ярьдаг болжээ. Ерөнхий сайдаар дэвшүүлэх Байнгын хорооны хурал дээр, - Уул уурхайд түшиглэхээс илүү хөдөө аж ахуйн салбараа түшиж ажиллана гэж У. Хүрэлсүх хэлсэн бол, УИХ-ын нэгдсэн чуулган дээр, - Шинээр байгууллагдах Засгийн газар уул уурхайн өрөөсгөл хамаарал, түүнийг дагасан эрсдэлийг бууруулж, эдийн засгаа олон тулгууртай болгох, хөдөө аж ахуй, газар тариалангийн экспортыг нэмэгдүүлэхэд анхаарна гэдэгт итгэл найдвар бага боловч төрж байна гэж ерөнхийлөгч Х.Баттулга хэлэв.
Ийнхүү тэдний ярьж хэлэх зүйл нь агаар нэг болсныг хоёрхон хоногийн зөрүүтэй болсон Байнгын Хорооны хурал, УИХ-ын Намрын чуулганы нээлт илтгэлээ. Энэ бүхнээс харахад, У.Хүрэлсүх ерөнхий сайд Уул уурхай, Гадаад харилцаа, Хөдөө аж ахуй, Сангийн сайдыг томилохдоо намтайгаа биш, ерөнхийлөгч Х.Баттулгатай хамгийн түрүүнд зөвшилцөх нь ойлгомжтой болж байна гэж дүгнэхэд хүргэв.
Мөн Засгийн газрын гишүүнээр Сумьяабазар аваргыг томилох нь үнэнд ойртжээ. Энэ бол Сумьяабазарын сайных биш, аварга дүү Аса Дагвадоржийн нөлөөлөл ч гэх чимээ ордноос хальж байна. -Өвлийн хүйтэнд сандал ширээ зөөхгүй, тамга тэмдэг солихгүй гэж У.Хүрэлсүх хэлсэн нь Засгийн газрын бүтцийг өөрчлөхгүй гэснийг нотолж байна. Тэрбээр, - Монголын төрийн түүхэнд хийсэн ажилтай,өөрчилсөн зүйлтэй ерөнхий сайд болохыг хүсэж байна гэж хэлснийг нь Хөдөө Аж Ахуй, Газар тариаланд анхаарна гэсэнтэй нь холбон ойлгож болох нь гэдгийг улс төр судлаачид тодотгож эхэллээ. Энэ засгийн газрын хамгийн "үнэтэй" сайдын нэг нь ХХААЯ-ны сайд болох тийшээ хандсан байна.
Ц.ЭНХБАТ